Van Volcmaer die XVI bisschop van Uutrecht.
Dat XIX capittel.
Volcmaer, gheboren uut Vrieslandt, worde nae den doot des gloriosen ende eerwaerdighe bisscop Baldrijcs gecoren tot enen bisscop van Uutrecht. Dese heilige Baldrycus starf int jaer Ons Heren IX C ende LXXVII, als dat Roemsche Rijck regerende was keyser Otto die tweede van dyer namen, als hij dat bisdom hadde beseten LIX jaren. Ende in sijn stede werdt dese eerwaerdige man Volcmaer gheconsacreert ende ghewijt, dye sestiende bisschop van Uutrecht. Hij was een sachmoedich man van leven, vuerich ende devoet in sijne ghebeden ende der diensten Goeds, milt tegen den armen, ende een spieghel ende exempel allen gheestlicken luyden.