Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van eenre ghifte ghegheven der kercken van Uutrecht van der stat van Deventer ende tgraefscap van Amelandt ende Trenten.
Dat IIII capittel.

[p. 121v]

Onder desen biscop Bernulphus' tiden worde die Heilige Kercke van Uutrecht van keiseren ende andere heren seer begavet ende doteert mit vele heerlicke goeden, want in den eersten gaf keyser Henrick die III van dier name der kercken van Uutrecht die stadt van Deventer mitter graefscap van Amelant bi enen brieve inhoudende aldus

Henrick, bi Goeds gracie coninc van Romen; kondich si allen menschen dat wi doer liefte ons vaders, keyser Coenraet, ende doer instancie ende supplicatie mijns beminde huysvrouwe Agniese, ende bi bede ende begeerte des eerwaerdigen here Bernulphus, bisscop van Sinte Martijns kercke tot Uutrecht, geven dieselve kercke alle die proprieteyt ende eygendom, die wi mit alre naersticheit altijt onder onsen potestaet ende mogentheit gehouden hebben in der plaetsen Deventer genoemt in der monete, tollen, profiten ende incoemsten, mittet graefscap van Amelant daeromtrent gelegen, ende vestigen dese ghifte mit alsulker vigoer ende cracht, datter gheen scatter groot noch cleyn enige macht sal hebben yet te eyschen, sonder oerlof ende beveel des biscops van Uutrecht. Mer dat dieselve biscop ende sine successuer ende navolger van deser voernoemder coninclicker gaven sal hebben een vrien macht ende besit te commuteren, te geven ende te stellen na sinen wille tot behoef ende profijt der kercken voerseyt. Ende om dit vast te maken ende onverbroekich te houden, hebben wi mit onsen eygen hant desen brief onderteykent ende besegelt. Gegeven int jaer Ons Heren M XLVI opten etcetera.

Voert int jaer daerna, gaf dese keyser voernoemt der kercken van Uutrecht dat graefscap van Trenten ende daerof een bulle in navolgender forme:

Henricus, by der gracien Goeds keiser van Romen, kenlick si allen menschen, dat wi tot remedie onser ende onser ouderen sielen, doer bede onser coninginne Agniese der kercken van Uutrecht, in Sinte Martijns ere gesticht, ende den biscop Bernulf derselver kercken, geven dat graefscap dat na der doot des hertogen Ghoselijns in Trenten an mi gecomen is, in een vrien eygendom, mit alle sine profiten ende toebehoren, ten ewigen dagen te ghebruyken sonder yements tegenseggen. Ghegeven den XI kalende van junio, int jaer Ons Heren M. ende XLVII.