Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier beghint die XI divisie ende heeft XII capittelen.

Paeusen.
Anno M ende C.
Dat I capittel.

Paschalis die II was die C LXX paeus, een Ytaliaen, ende sat XVIII jaer ende VI maenden, VII dagen. Hi arbeyde seer naerstelick voer die Heylige Kerck, tegen keysers ende coninghen hem settende. Hij verwan ende verdreef Gilbertum, Arnulphum, Theodricum ende Albertum, dye tegen hem paeusen gecoren waren, ende storven alle quader doot. Dye keyser merckende dat hem die hant Goeds tegen was, gaf zijn macht over van biscoppen ende abten te kiesen in des paeus handen. Mer doen hi van den paeus geconfirmeert ende ghecroent was, doe ving hi den paeus mit alle zijn cardinalen, ende soude die paeus weder uutcomen, hi most dye biscoppen ende abten confirmeren die¹⁴⁵

die keiser geset hadde. Ende in dier manieren worden si weder verenicht, ende croende den keyser feestelicken noch eens. Ende als die keyser weder in Sassen ghecomen was, vergaerde die paeus een concilie te Latranen, ende revoceerde ende wederriep alle datgene dat hi den keiser gegeven ende gegont hadde, want hi dat mit bedwanck doen moste. Na desen twiste wyede die paeus XV kercken binnen Romen; ende als hi gestorven was, wort hi te Romen begraven in Sinte Salvatoers kercke, die men hiet Constantiana.

Gelasius die II was die C LXXI paeus, uut Campavien, ende sat een jaer ende V dagen. Hij wert eendrachtelicken gecoren van den cardinalen. Mer want Cinthius, een machtich Romein, liever enen anderen hadde gehadt, so vervolchde hi desen, ende heeft hem onder dye voeten geworpen, mit voeten getreden ende geslagen, ende ten lesten in banden geworpen. Mer dye gemeenten van Romen verlosten hem corts daeruut, ende is van den goetwilligen gecroent geworden. Mer uut vresen van keiser Henric die V, die hem oeck vervolchde, toech hi in Vrancrijc, ende quam int cloester van Cluniaeck, in Borgondien; daer hi starf, ende werdt aldaer in die kercke begraven.

Calixtus die II was die C LXXII paeus, een Borgongoen, ende was des graven van Borgongen broeder; ende sat V jaer, X maenden ende XI dagen. Hij wert van den cardinalen die tot Cluniaeck¹⁴⁶

waren, paeus ghecoren, mer hi en woude dat niet annemen, voerdat dye cardinalen van Ytalien dairin consenteerden, als si deden,

145 ontbr. AB.

146 Cluniarck AB.

[p. 132r]

ende coren hem mede; ende doen quam hi te Romen mit groter staet, ende wert daer mit groter feesten ende eren ontfangen. Vandaen toech hi tot Beneventen, daer alle die princen ende heren van Ytalien sworen den paeus altijt voir te staen, als si des versocht worden. Vandaen toech hi weder te Romen, ende sende legaten an den keyser Henric die V, om te confirmeren den vrede tusschen hen beyden gemaect wesende, dwelc also geschiede. Hierenbinnen heeft die paeus een stat in Ytalien belegen, dien hi wan, ende nam gevangen Burdijn, een Spangaert, denwelcken die keyser daer te voren paeus gemaect hadde; ende sette hem aersseling op een muyl, mitten staert in sijn hant voer een toem, ende brochten also te Romen, ende sloet hem in een cloester, daer hij in starf. Ten lesten, als hi voer God ende den menschen eerlic ende doechtlic ghewandert hadde, is hi ghestorven, ende tot Sinte Jans te Latranen begraven.