Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van Florijs, die men hiet die Vette, dye VIII grave van Hollant.
Dat IIIA capittel.

Florijs die II van dyer namen grave Dircs soen, worde na sijns vaders doot die VIII grave van Hollant, Zeelant ende here van Vrieslant. Hi was gemeenlic geheten grave Florijs die Vette, ende was een frisch, vroem ende heerlic prince, groot van statuere,

[p. 133v]

sere vreedsaem, ende uutermaten milt teghen den armen; ende was een yegelick behulpelic ende nyements scadelick. Dese grave Florijs hadde tot enen wive hertoge Dircks dochter van Sassen, ende was des keisers Lotharijs suster van Romen, daer hi bi wan Dirck, die na hem grave werdt; Florijs, die men hiet die Swarte prince van Kenemerlandt; joncheer Simon ende Hadewijck, graefinne van Gelre, een uutnemende scone joncfrouwe. Dese grave Florijs was den religie ende geestlicheden sere gonstich, waerom dat hi (navolgende sine voervaderen) Sinte Aelbrechts Goedshuys tot Egmont mildelicke gaven ende ghiften heeft geassigneert ende gegeven, onder enen brieve ludende¹⁴⁹ aldus:

In den Name des Heiligen ende Onversceiden Drievoudicheit. Ic, Florijs, bi der gracien Goeds grave van Hollant, doe kondt allen kersten menschen, dat wi den buyren van Heilgom ontlasten ende quijtscelden van den swaren insettinghe ende scattinge om den last dien si hadden in hoere doden begravinge; ende houwen se van nu of vry, mits desen op conditien dat si daervoer Sinte Aelbrecht thienden sullen van alle vruchten die haer lant voertbrengt, geven. Item van alle hoer jonge paerden, koyen, scapen, verckens ende gansen, alst gemeenlic overal geschiet. Ende omdat dese onse ghifte autentijck ende onverbroekelic mach bliven, hebben wi desen brief mit onsen zegel ende des abts zegel, here Adelaert in onser presencie doen besegelen. In kennisse der waerheit hebben hier bi geweest als wittachtige tughen here Athalbaert, abt voernoemt; Tiewijn, deken; Andries, ende die gehele congregatie van Sinte Aelbrecht, priesteren of clercken; Reymoldt, Ulbolt, Rembrant, leken; ic, Florijs, graef van Hollant; Galo ende Ysbrant, des abts broederen; Dodo, ridder, ende Dirck zijn soen, mit vele andere, gegeven tot Egmont in Sinte Pieters Kerck int jaer Ons Heren M C ende VIII, int derde jaer keyser Henrics die V, op die Octave van Paesschen, die tweede indictie.

149 ludeude AB.