Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dese biscop gaf den canonicken van Sinte Martijns Kerck die kerck van Medenblick, mitter proestye van West-Vrieslant.
Dat V capittel.

Dese eerwaerdige biscop, anmerckende dat so wanneer des smenschen hert becommert is om te voersien van noottrufticheit des lichaems, hem alsdan niet wel

[p. 134r]

geven en kan tot contemplacien der hemelscher dinghen, waerom dat hij sine medebroeders ende heren der Heyliger Kercken van Uutrecht verleent ende ghegeven heeft die kercke van Medenblic mitter proestye van West-Vrieslandt, hem daerof ghevende een bulle sprekende aldus:

In den Name des heiligen ende onversceydenre Drievoudicheit. Amen. Wi, Godebalt, by der gracien Goeds biscop der kercken van Uutrecht, kenne gegeven te hebben onsen medebroederen ende heren, God dagelixs dienende in der kercken van Sinte Martijn binnen der stat van Uutrecht, die kercke staende int dorp van Medenblic, mitter offerhande ende die proestye van West-Vrieslant, mit alle sinen toebehoren, dat si die voertan bi hem selven sullen disponeren ende regeren in allen schine als si van ons tot noch toe gheregeert is gheweest. Welcke ghifte wi mit onsen segele hebben gestarct. Gegeven int jaer Ons Heren M C ende XVIII, die XI indictie.