Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen oploep binnen Uutrecht opten Pijnsterdach.
Dat VIII capittel.

Op deser selver tijt was binnen Uutrecht gecomen keyser Henric dye V, ende hilt aldaer die hoechtijt van den heyligen Pijnsterdach. Ende also dair veel volcs vergadert was, is daer twist ende gescille ghe-

[p. 134v]

vallen tusschen des keysers ende des biscops dienres, ende geviel alsoe groot, dat si den biscop mitten sinen afterwerts drongen te vlien in Sinte Martijns Kercke. Ende daer werter vele gevangen ende dootgeslagen. Ende onder andere wert die biscop mede gevangen ende voer den keyser ghebrocht, ende wert in sekere hoeden geset; mer niet lanc, hi en brack uuter vangenissen ende ruymde die stat. Ende alle dese twist ende oploep was geschiet doer anleggen eens dienres, ghenoemt Ghiselbrecht, die desen biscop seer vervolchde ende infesteerde. Mer nyet lange dairna die keyser deden vangen ende onthoefden.

In ditselfde jaer van M C ende XXI wert die Grote Kercke binnen der stede van Leiden gewijt in die ere der heyliger apostelen Sinte Pieter ende Sinte Pouwels, des sonnendages na Onser Liever Vrouwendach Geboerte.