Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van der reformatie des cloesters van Egmondt.
Dat VI capittel.

In den jaer Ons Heren M C ende XXIX, als dat heerlicke convent ende cloester van Egmont int geestlick ende int waerlick sere gedissipeert, verstroeit ende vergaen was, ende die abt Anselijn voerseit dat cloestre voertan niet wel en mochte regeren, ende was dairto gebrocht dat hi als onwillich dat officie hadde resigneert ende overghegeven, heeft die Godlicke gracie den bisscop ingegeven, ende heeft sine ambassaten gesonnen an Petronelle, graefinne van Hollant, grave Dircs moeder, om dit convent te hulpe te comen, dattet bi lancheit van tijden mit allen niet en verghinge. Ende sonden eerbare notabele mannen an here Aernt, abt van Ghendt, om hem te willen senden enen monick uut sinen convent, die bequaem ware zielen te regeren ende uutwendelicke dingen te disponeren, ende datter vergaen was weder te repareren. Want daer weinich monicken in den convente van Egmont waren, overmits hoer oude ende vergangen quade levens willen. Die eerwaerdige abt heeft hierop raet ghenomen, ende heeft hem gesonnen een eerbaer man, genoemt here Wouter, dien hi daertoe kende bequaem ende oerber te wesen. Denwelcken die biscop Andries van Uutrecht geordineert ende ghewijt heeft op Onser Liever Vrouwen avont Geboerte te wesen die VIII abt van Egmont. Ende dese here Wouter siende ende merckende veel gebrecxs, en wist hem nergens te keren dan alleen tot God ende den heiligen confessoer Sinte Aelbrecht, doer wiens gratie ende gebeden hi alle dingen int gheestelick ende int waerlick mit goeder discretien ende voersichticheit heeft gedisponeert ende in goeder¹⁶³ ordinancien gheset, als die kercke ende andere dingen betugen die hi heeft laten maken. Ende als hij VI jaren daer hadde geresideert ende dat convent eerlic in structuren ende tijmmeraetsen restaureert ende verbetert, quam daer die suffragaen oft wibisscop van Uutrecht, ende consacreede ende wijde int cloester een outaer in der eren der glorioser Maget Marien ende allen Maechden, ende noch een in der eren des eersten maertelaers Sinte Steven; Sinte Jeroen; Sinte Laurens; Sinte Vincent ende allen heiligen martelaren. Daerna heeft dese here Wouter, die abt, gecoft van Goeswijn Ludolfszoen van Adrichom een stucke hoylants van een roede, gelegen in Westbrueck, bi des

163 discretien ende voersichticheit heeft gedisponeert ende in goeder herh. AB.

[p. 139r]

sgraven hoeylant. Hi gaf oec mede Berwolt, der kercken van Egmondts advocaet oft voecht V ponden ende een marck voir een stucke lants leggende in Rijswijker Broec, betalende jaerlicx VIII pont. Op deser selver tijt quam van Poelgeest een genoemt Baernt, ende worde convers, ende offerde God ende Sint Aelbrecht voer sine ende sijnre ouders sielen sijn huys ende tlant daerbi leggende, gheldende tsjaers XI uncen. Een ridder, genoemt Willem, van der familie ende huysgesinne des graven Dircxs van Hollant, afterlatende die werlt, is tot Egmont monick¹⁶⁴ geworden, ende heeft God ende Sinte Aelbrecht gheoffert ende gegeven ewich ende erflick III hele vierte ende een quartier weylants, legghende in Leyderdorp. Noch een hoeycamp boven Sigodessloch, als XXVI menschen op eenen dach ploegen mogen; ende een halve valginge van enen man. Noch sijn huys ende II hofsteden. Noch heeft dese abt vercoft enen ghenoemt Thyenout tlant in Oudendorpe, dat men nu ter tijt Huysdunen hiet, een pont tsjaers betalende, ende gaf daervoer LVI ponden, daer hi noch op leyde XXX ponden, ende coft dairom tlant geheten die Poel, dairt water omme loept, van des graven spijsdrager, genoemt Franck, ende sine broeders Alnoth ende Willem ende Ymme haer moeder. Totter selver poel hoert dat hoeylandt dat dese abt mede coft, also veel als XX luyden op enen dach ploeghen souden moghen.

164 monicb AB.