Hoe dat dese Swarte Florijs doot gheslagen wert.
Dat IX capittel.
Doe dit aldus volbracht ende dese twedracht gheleyt was, begonde Florijs die Swart eenen anderen, nyeuwen gescheel ende gekijf, daer hi onlancxs om doot geslagen wert. Want Govert van Arlisberch ende Harman van Cuyck, twe vermairde graven ende lieve gebroederen, hadden enen nichte, Heylwijck genoemt, die Arent van Rochem bi Alijt, haer beyder suster, hadde gewonnen; welcke joncfrou Harman, grave Van Cuyck hoer oem, nam in sijnre hoeden na hoerre ouders doot. Die dienres van deser joncfrouwen anmerckende die grote vromicheyt van Florijs dye Swarte voerseyt, wouden hem gheven dese joncfrouwe tot enen gheechten wive. Mer Govert ende Harman, hoer omen, mitten here Andries van Cuyck, biscop van Uutrecht, en wouden dat niet gehengen, ende wederstonden Florijs hierin mit alle sinen hulpers. Mer dye van Uutrecht, uut vrese des keysers van Romen, Lotharijs, ende oeck uut lyefde des graven Dircxs van Hollant, ontfinghen si Florijs dye Swarte, ende gaven hem in der stat eenen vryen inganck ende uutganck, na sijn selfs wille; ende deden hem oec mede bystant ende hulpe tot vele tiden. Alsoe dat dese Florijs verbrande int Sticht van Uutrecht dat dorp Lexmonde, tot spijt ende versmadenis des biscops Andries van Uutrecht. Doe dit aldus geschiet was, dochte Harman van Cuyck mit heymelijcker lagen desen Florijs te vangen, want hi hem openbaerlic niet wederstaen en mochte. Wairom dat hi hem lagen leyde buten dye murenGa naar voetnoot165 van Uutrecht, ende verhude aldair zijn volc, daert heimelic was. Des smorgens vroe in der dageraet quam Florijs heerlicken uuter stat mit X jongelingen, valkenaers, riden, ende viel onverhoets onder den lagen ende in den handen sijnre vianden. Dit siende, stack hi sijn paert mit spoeren, ende gaf hem ruym den thome, kerende hem ter stat waert. Mer hi storte neder mitten paerde tot absteden, ende sine vianden vervolchden hem snellicken, ende sloegen hem daer doot mit groten nyde ende wreetheit.
Auteursrechtelijk beschermd