Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek) (2011)

Informatie terzijde

  • Verantwoording
  • Inhoudsopgave

Downloads

PDF van tekst (7.77 MB)

XML (3.56 MB)

tekstbestand






Editeur

Aarnoud de Hamer



Genre

non-fictie

Subgenre

kroniek
non-fictie/geschiedenis-archeologie


© zie Auteursrecht en gebruiksvoorwaarden.

Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

(2011)–Cornelius Aurelius–rechtenstatus Auteursrechtelijk beschermd

Vorige Volgende
[pagina 145r]
[p. 145r]

Van enen groten stride die gheschyede tusschen grave Florijs van Hollant ende grave Phillips van Vlaenderen, ende hoe die grave van Hollandt daer ghevanghen werdt.
Dat VII capittel.

Nu keren wi weder opten grave Florijs van Hollandt, die, als hi den Vriesen hadden verwonnen, heeft van den grave Philips van Vlaenderen gheeyscht weder te hebben dat lant van Walchren, dat welcke die graven van Vlaenderen, sijn voersaten, een tijt van jaren beseten ende mit onrecht onder hem gebrocht hadden. Hiertegen screef Phillips, graef van Vlaenderen, an desen grave Florijs, sinen neve, dat hy sijns vaders patrimonye hem in rechter erfnis gelaten, wilde mitten swaerde beschermen. Waerom dat grave Florijs bi hem nam drie graven, te weten van Cleve, van Ghelre, van den Berge, mit X M ghewapender mannen, ende toech daermede int graefscap van Aelst, dat onder desen Phillips, grave van Vlaenderen, stont, ende vernieldet al mitten vuere ende swaerde, daer hij bi quam, ende maecte een swaer belegge mitten III graven voernoemt, voer die stede van Armestein, die hi daghelicxs mit swaren assaulte ende stormen seere bevacht, also dat die van binnen an horen here grave Phillips van Vlaenderen screven, dat hi hen te ontset quame, of si mosten van node die stede opgheven in handen der vianden. Die grave Phillips, mit zijn broeder Matheus, grave van Boenen, vergaderde vele soudeniers uut Piccardien, Artoys, Vermandoys, Henegouwen, Ardennen ende uut Vlaenderen, ende isser medegecomen voir Armestein; ende daer is op dien dach enen swaren strijt opgheresen. Ten lesten, na datter lange tijt vromelic gevochten was, worden dye III graven voernoemt mit dat meeste deel van graef Florijs' volc voirvluchtich. Mer graef Florijs bleef vromelick te velde, ende vacht manlick teghens sine vianden, ende en woude hem niet ghevangen gheven, eer dat hi bina ter doot toe gewont was; dien die grave van Vlaenderen minlic ende hoeschlick mit hem in Vlaenderen gevangen voerde, ende dede hem mit groter naersticheyt cureren, ende sijn wonden ghenesen, want hy sijn naeste neve was. Dit verhorende dye aertsbiscop van Coelen ende die bisscop van Ludick, sijn mit veel edele mannen in Vlaenderen gecomen, ende hebben enen pays gemaect tusschen dese II machtige graven van Hollant ende van Vlaenderen, op sulcker conditien, dat si voertan goede vrienden ende ghebueren souden bliven. Ende Phillips, grave van Vlaenderen, soude besitten ten ewigen dagen tlandt van Waes, ende grave Florijs soude weder ontfangen ende behouden ten ewigen dagen tlant van Walchren, ende soude voert meer senden uut Hollant, Zeelant ende Vrieslant M verstandele dykers op graef Phillips costen, om dat gat te stoppen datter overmits dat sware opwater in den dyke bi den dam ingebroken was, also dat die stat van Brugge rontomme int water stont. Ende men mochte dat inbreck van den dyke mit ghenen materie van houdt, aerde oft stenen stoppen, wanttet al viel oft in afgrondelose diepte ende wale gevallen hadde; waerom dat op die tijt die stede van Brugge, ende al dat lant daer omtrent, in groten perikel stondt. Grave Florijs, als hi in Walchren ontfangen ende gehult was voer enen here, quam weder in Hollant, ende sende in Vlaenderen die alre beste werckmannen om dyken te repareren ende weder te maken, also alst in der zoenen ende payse begrepen was. Dyewelcke comende by den dam, vonden onder den ghebroken dijck een hont leggen baffen ende hulen, die VI daghen ende nachten lang maecte een gryselic geluyt; ende wisten niet, wattet beduden mocht. Ten lesten hilden die oude dijcmeesters raet mit malcander, ende sloten dat men den hulende hont int gat soude werpen; ende terstont trat daeran een onversaecht Hollander, ende greep den hont by sinen start, ende werp hem int grondelose ghat. Dit ghedaen wesende, brochten sy snellicken grote menichte van aerde ende groene zoeden, ende worpen die daerop; ende hebben dat gat also ghestopt ende grondt ghecreghen. Ende want daer vele arbeytsluyden waren dyet daer onthilden met haer hutgens ende tenten in een manier van

[pagina 145v]
[p. 145v]

een stedeken, so gaf die grave Phillips, dit siende, alle denghenen die daer bliven wilden al tlant dat si bedyken mochten ende van der zee inwinnen, van den dam tot Aerdenburch, ten ewigen dagen te besitten, voir hem ende hore nacomelingen; ende gaf hem noch hierenboven vele andere vrydommen ende privilegien, waerom datter vele Hollanders ende Zeelanders daer bleven, ende maecten te mit in voortghanck des tijts een stede dye sy noemden van den hont die int gat geworpen was Hontsdam.


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken