Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van here Aernt van Ysenburch, dye XXX, ende here Dirck van Hollandt, die XXXI electen van Uutrecht.
Dat VIII capittel.

Hierna, in den jare Ons Heren M C ende XCVIII, hadden Dirc van Hollant ende Arent van Ysenborch de sentencie diffinitive van horen pleite in den hove van Romen, sodat here Arent dat bisdom behildet met listen van den Cortisanen, die hem des rechts ende hoofs verstonden, also alst daer veel op listen staet, God betert dat ment seggen moet; want die man mitten ghelde gaet voer den man mitten rechte, ende listighe vonden doden dat recht. Ende here Arent wert aldaer gheconsacreet ende ghewijt die XXX biscop van Uutrecht; mer hi leefde onlange daerna, ende starf aldaer binnen Romen, ende wert daer begraven. Ende nae sijnre doot heeft dese selve paeus Innocencius die III dat open bisdom ghegeven here Dirck van Hollant, ende wert aldair gewijt die XXXI¹⁹²

biscop tUtrecht. Ende also schier als bisschop Dirc van Romen scheide ende hij in sinen bisdom trecken soude, is hi oec gestorven, tot Paduen, in der stadt, ende werdt daer mit groter eren begraven.

192 XXX AB.