Hoe dat biscop Dirc van Uutrecht oflivich worden.
Dat vijfte capitel.
Die biscop Dirc van Uutrecht, die in desen oerloge vele scats ende goets gewonnen hadde, lossede zijn landen ende sloten, ende spysde sine castelen ende burgen, ende betaelde zijn scult die hi in den hof van Romen sculdich was; ende hi is ten lesten gestorven tot Deventer, ende wert tot Uutrecht gebrocht, ende daer begraven in der Domkercken, bi sine voervaders, int jaer Ons Heren M II C ende X, als hy dat bisdom XIII jaer lang hadde regeert met groter eren.