Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen oerloge tusschen biscop Otte van Uutrecht ende grave Otte van Gelre ende hoe si verenicht worden.
Dat III capitel.

Omtrent dese tijt quam here Otte van der Lippe, biscop van Uutrecht²²⁷ weder van den Heiligen Lande, ende vandt alle zijn landt in goeden ponten ende vreden; mer hi quam onlanxs daernae in groten onvrede, want grave Otte van Gelre vele leenmannen ende vassallen wonende hadde int lant van Zallant, die sere swaerlic bescat worden van des biscops amptluden ende officyers, sodat si sere arm worden ende verbistert van tijtlyke goeden ende haven; waerom dat grave Otte des biscops luden by der tollen van Lobeck dede arresteren ende becommeren, ende maecte een conspiratie ende verbant mitten Zallanders tegen den biscop horen here. Biscop Otte van Uutrecht, overmits raet ende hulpe biscops Dircs van Monster ende grave Harmans van der Lippe, sine broeders, versamede een groot heer van volck om daermede te trecken in die graefscap van Gelre, ende die te verbarnen ende te verwoesten, ende dat volck van Zallant mit machte bedwinghen. Ende daertegen vergaerde dat volc uut Zallant mit hulpe grave Otten van Gelre bi Brokelo opten dijc, ende wouden den biscop wederstaen; mer die biscop quam hen manlic teghen, ende daer wert sere gevochten, soe datter vele doden bleven. Ende daer wertter vele gevangen, ende vele liepender wech. Ende die biscop behilt die victorie ende hadde den zeghe, ende toech voert ende gewan tcasteel Ter Voirst, dat hi destrueerde, ende tcasteel tot Bochorst verbrande hi altemael, uutgheseit den groetsten toorne. Want die drossaert mitten burchsaten van desen casstelen hadden al dezen twist gemaect ende hadden dat gemeine volc van Zallant tot ongehoersamheyt ende rebelheyt eerst verwect tegen horen here den biscop. Die grave Otte van Gelre, die seer oevel nam des byscops zeghe ende victorie, creech in zijnre hulpe den hertoge Walraven van Limburch, grave Henric van der Zeine, mit II M ridderen ende knechten, ende badt mede den jongen grave Floris van Hollant, sinen neve, an hem assistencie in desen oerloge te doen; ende grave Floris quam de Lecke opgevaren mit ve-

227 uurecht AB.

[p. 159v]

le scepen, ende verbrande des biscops huys te Gheijn. Ende daertegens biscop Otte van Uutrecht mit hulpe biscops Gherrits van Bremen, zijn broeder; biscops Dircs van Monster, sinen neve; ende grave Hermans van der Lippe, sinen broeder, heeft vergadert dusent rydderen ende knechten, ende woude daermede dese princen ende vorsten bestreden hebben. Mer die biscop Conraet van Portuen, legaet der stoelen van Romen, quam by avonturen ter plaetse daer dese strijt geschien soude, ende nam die op in zijn handen, ende dede daervan enen uutspraec tusschen dese twe partien, als dat die grave van Gelre soude quijtscelden ende overgeven der kercken Sinte Martijns tot Uutrecht alsulke anseggen ende recht als hi hadde an de voechdie van den lande van Zallant; ende die biscop soude dat slot te Clysteren ende tot Sinte Odilienberge, uutgenomen die proestie ende dienstmannen ende vasallen, den grave van Gelre wedergeven, ende te lene van hem houden. Ende die grave van Hollant soude hebben voer sine dienstmannen VIII C ponden, de hi daer wonende hadde; ende soud se daermede der kercken van Uutrecht vry ende quytscelden.