Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dye coninck dede maken dat schone hof in Den Haghe.
Dat XIII capitel.

Nu is coninc Willem in Hollant gecomen, daer hi mit groter waerdicheit, eer ende triumphe ontfangen wert als wel recht was, ende quam terstont in Den Hage, ende dede ontbieden verstandele wercluden om een coninclijc pallays daer te doen maken, ende heeft daer gefondert die scone hoge zale ende die capelle, mit scone, welgechyerde cameren, als men noch sien mach, ende heeft bi rade zijnre heren dat hof dat tot tsGravensande te wesen plach translateert ende overgeset in Den Hage, om aldaer te tracteren de sware sa-

[p. 168v]

ken des Rijcks ende des lants, om doer²⁷² alsulke manieren dye glorie ende ere van Hollant andere natien dye daer dicwils by hem quaem, kondich te maken, ende also men seit so is dese oude hoge zale in Den Haghe getijmmert van hout dat uut IJerlant gecomen is. Welck die natuere heeft, dattet nijmmermeer en rottet, noch daer en comen geen spinnen noch spinnencoppen an; want alle houtbladen van bomen oft aerde comende uut IJerlant is goet voer alle fenijn. Ende na desen dede hi oec maken dat huys tot Heemskerc tegen den West-Vriesen, daer hi enen geheten here Gherrit van Heemskerck, castelein of maecte, myt conditien dat hi die Vriesen altijt in roere houden soude, ende nijmmermeer laten rusten, mit seker getal van cloeke mannen ende soudenieren; ende daervoer soude hem die coninc doen geven III C ponden tsjaers, ende maecte hem daertoe baeljuu van Kermerlant, om des wille, oft sake geweest waer dat hem last van den Vriesen anghecomen hadde, dat hy dan thele baeljuuscap hadde mogen uutbieden om dien last ende noot te wederstaen.

272 aldus C; daer AB.