Hoe ende an wyen grave Floris hijlickte ende van sijn kinderen.
Dat XV capittel.
Als grave Floris dat landt van West-Vrieslant onder hem hadde gebrocht, machtelicken ende vredelicken dat besat, Gwide Dampier, grave van Vlaenderen, is mit groot volc van wapenen overgevaren in Zeelant, om Walcheren in te winnen ende onder sine subjectye te brengen. Die grave Floris dit vernemende, heeft terstont vergadert een groot machtich volc van wapenen om desen grave van Vlaenderen te wederstaen, ende enen strijt mit hem te vechten. Dit vernemende hertoge Jan van Brabant, is haesteliken in Zeelant gecomen, ende309 heeft den strijt op genomen, ende heeft enen vasten pays ende vrede ghemaect in deser manieren: Als dat grave Floris te wive nemen soude Beatris, graven Ghien dochter van Vlaenderen. Ende daermede souden si goede vrienden bliven, ende elc soude trecken in den sinen, dwelc also is geschiet. Grave Florijs heeft dan dese dochter van Vlaenderen mit groter solemniteiten ende eren getrout, ende wan an haer veel kinderen, als Jan, Dirc, Floris, Willem, Otte, Willem, Floris, Beatris, Machtelt, Elizabeth ende Margriet. Ende alle dese kinderen zijn jonc gestorven ende tot Loesdunen int cloester begraven, uutgeseit die outste, Jan, die grave na sinen vader worde. Dese grave hadde oec II bastaerts zonen, als Witte den eersten, here van Haemstede in Zelant, ende Willem, ridderen. Dese grave Floris dede maken veel costelicke hoven ende ridderlicke woningen, alst huys der Vogelensanc in Haerlemmerhout, daer hi stadelicken mit heren ende ridderen, vrouwen ende joncfrouwen plach te hoveren, vliegen ende jagen ende ridderlicke oeffeningen van steken ende ternojen te hantieren; dairna dede hi groter ende costeliker maken dat hof in Den Hage, als dye capelle ende andere cameren, ende andere vele sloten ende scone woningen.