Van Johan van Zyrick, die XL biscop van Uutrecht, ende van den oerlogen die hi hadde tegen den here van Aemstel ende Woerden.
Dat XVII capittel.
In den jaer Ons Heren M CC LXXXVII screven dye heren des Stichts van Uutrecht an grave Floris van Hollant, dat hi woude comen totten Raet des Capitels der Kercken van Uutrecht, want si Johan van Nassouwen, elect van Uutrecht, mer niet geconfirmeert, van den bisdom setten wilden. Ende also dese elect Johan dat slot van Vredelant verset hadde om een somme van penningen an heer Ghijsbrecht van Aemstel, ende tslot van Montfoerde an heer Harman van Woerden, so beclaechden hem dat gehele Sticht van Uutrecht. Ende want nu dese elect Johan van Nassouwen als een waerlic man dat Sticht van Uutrecht XX jaren hadde berecht, ende des Stichts goeden ende sloten an vele woekenaers tot een onderpant hadde belast ende geset, ende in groten swaren sculden hadde gebrocht, so hebben die heren des Stichts van Uutrecht, geestelijc ende waerlic, onsen Heiligen Vader den paeus van Romen den jammerliken staet des Stichts ende kercken van Uutrecht gescreven ende te kennen gegeven, ende hebben seer oetmoedeliken gebeden voer enen geheten Johan van Zyric. Die paeus dese supplicacie anmerckende, heeft overmits paeuselicker macht den voirseiden Johan van Nassouwen van dat bisdom ofgeset, ende heeft den voernoemden Johan van Zyric voersien mit dat bisdom van Uutrecht. Ende aldus is dese Johan van Zyric geordineert ende gemaect die XL biscop van Uutrecht. Ende als nu dese Johan, van311 dier namen deerste, biscop geworden was, so heeft Ghijsbrecht van Aemstel, die tslot van Vredelant in onderpanden besat, dat gemene volc des Stichts van Uutrecht mit nyewe exactien ende tollen beswaert, waeromme dat die biscop van Uutrecht bi raet des stats ende kercken van Uutrecht desen Ghijsbrecht heeft doen presenteren zijn uutgeleide penningen, dair hi tslot mede hadde beleent, ende begeerden dat slot te vrien ende weder an dat Sticht te hebben. Mer Ghijsbrecht allegeerde vele saken ter contrarien, ende en wilde dat niet doen. Waerom die biscop groot volc van wapenen heeft vergadert om die heerlicheit van Aemsterlant te verwoesten ende dat slot van Vredelant mit cracht van Ghijsbrecht weder te recupereren ende winnen. Daertegen heeft Gijsbrecht van Aemstel mit Harman van Woerden een machtich volc uut Hollant vergadert, ende quamen dairmede in Zesorinc, om tegen den biscop te striden. Ende als dese II heren bi malcander quamen, is dair een grote strijt gevallen, mer de biscop creech die overhant, ende heeft den here van Aemstel mit alle sine ondersaten ende strijtber mannen verjaecht, ende vele gevangen ende geslegen. Dit siende Harman van Woerden, is mit dat Hollantse heer angecomen mit groter macht van volc, om den biscop uuten velde te verdriven. Mer in den eersten anganc worde dese Harman swairliken gewont312, ende wesende int uuterste des