Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die heerlicheyt van Hoesden gheworden is een leen an Hollant.
Dat XIX capitel.

Int jaer Ons Heren M CC XC waren bieen vergadert in tsGravenhage, in vrolicker geselscap, grave Floris van Hollant ende grave Dirck van Cleve. Dus sittende, heeft die grave van Cleve geresigneert ende vri overgegeven sinen neef graef Floris, die leengoeden ende heerlicheden van Hoesden ende Outhena, quijtsceldende al sine vasallen ende leenmannen horen eet, die si hem hadden gedaen, behoudelic dat si hoer leen ende goeden van den voerseiden grave van Hollant versoeken souden, als si van hem te houden plagen. Van denwelken openbair brieven voer den hove van Hollant worden gemaect ende bezegelt. Ende here Johan van Hoesden, die ontfinc doe van grave Floris van Hollant die heerlicheit³¹⁴ van Hoesden ende Outhena³¹⁵ tot een vri leen; ende aldus is Hoesden ende Outhena mit dat slot ende stede van Woudrichom geworden een heerlic leen van Hollant.

314 heerlic AB.

315 Outheva AB.