Hoe dat joncheer Jan an hem nam dat regiment van Hollant.
Dat VI capitel.
Die grave Jan van Henegouwen wesende tot Haerlem, als hi verhoerde dat joncheer Jan zijn neve uut Engelant over was gecomen, heeft hy hem also sere gehaest als hi mochte, ende is gecomen tot Dordrecht; ende hi zende notabile heren ende mannen tot joncheer Jan, sinen neve, dat hi quame tot Dordrecht; hi woude hem die heerlicheit ende dat regement van Hollant weder resigneren ende overgeven. Denwelken joncheer Jan wederom ontboet bi Alant, den balju van Dordrecht, seggende: 'Coemt tot mi mit hondert man op een vry geleide tot RotterdammeGa naar voetnoot324'; daer graef Jan weder op antwoerde, seggende: 'Daer en is geen viantscap tuschen ons beiden; aldus en behoeve ic zijn geleide niet.' Doe spraken die heren ende overste van Dordrecht ende seiden: 'Doerluchtige prince ende here, belieftet u te reisen tot RotterdamGa naar voetnoot325 bi uwen neve den grave van Hollant, wi willen u geleiden ende mit u reisen mit alle onsen macht'; daer die grave op antwoerde: 'Het is beter dat ic hier blive ende verwachte den tijt dat hi hyer coemt tot mi.' Ende dit geseit wesende, bleef die grave van Henegouwen noch een wijl tijts binnen Dordrecht; ende ten lesten is hi vandaen gereist, ende is wedergetogen in Henegouwen. Ende na dyen tijt namen ende ontfingen die heren ende edele van den lande joncheer Jan, de een jonc man was, totten XVII grave van Hollant ende Zeelant.
Auteursrechtelijk beschermd