Hoe here Jan van Renes uutten lande gebannen worde.
Dat X capitel.
Hierna ist geboert, dat grave Jan van Hollant sonderlinge saken had te tracteren, mit sinen neve hertoge Jan van Brabant ende grave Jan, quam tot Reimerswael; ende hertoge Jan quam tot Bergen an den Zoem. Als nu here Jan van Renes, die een cloec, wijs ende voersichtich man was, wederom quam, ende sine bootscap hadde gedaen van des graven weghe an den hertoge van Brabant, ende hi sijn antwoert van der commissien den grave opdoen soude, soe worde die grave ghewaerschuwet, dat hy wel voer hem sage, want het was gesloten bi den hertoge ende Jan van Renes, dat waert sake dat hi in Brabant quame, dat men hem levendich vangen soude, ende dat here Jan altehans een conspiracie ende verraet mitten Brabanders hadde gemaect, om hem te leveren. Waerom grave Jan is getogen opt slot van Lodijc, ende heeft aldaer bi hem vergadert een deel volcs uut Hollant tegen here Jan van Renesse. Here Jan vernemende dat hi aldus teghen den grave was vermaect ende belogen, is getogen op sijn slot tot MoermontGa naar voetnoot326, ende heeft dat voersien mit vitaelge ende volc van wapenen. Daerna is grave Jan getoghen ter Vere, ende heeft doen verdachvaerden den here Jan van Renesse, dat hi comen soude ter Vere ende hem verantwoerden. Mer omdat here Jan gheen vri vast geleide van den grave crighen en mochte, en dorst hi niet comen; ende here Jan wort verwonnen ende gebannen uut die graefscap van Hollant ende Zeelant; ende die grave heeft dat slot van MoermontGa naar voetnoot327 belegen ende anghestormt ende ten lesten gewonnen, ende heeft ter aerden toe doen nederwerpen ende geslecht.
Auteursrechtelijk beschermd