Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier beghint die XXI divisie, ende heeft XXIIII capitelen.

Dat eerste capitel.
Anno M CCC ende II.
Pausen.
Benedictus die XI paeus.

Benedictus die XI was die CC ende derde paeus; hy was een Lombert. Hi sat VIII maenden ende XVII dagen. Hy was van der Prediker Oerden, ende was een heilich man van leven. Hi starf te Perusen ende wert aldaer in zijn convent begraven, doende vele miraculen, bisonder over denghenen die mitten viant beseten zijn; ende de Stoel bleef ledich staen XI maenden.

Omtrent dese tijt openbaerde een grote comeet; daernae volchde een grote aertbevinge, dat zijns gelicxs nyet veel gehoert noch gesien en was. Die luden liepen uuter steden ende woenden int velt.

Clemens die V was die CC ende IIII paeus. Hy was uut Gascongen ende besat den Stoel VIII jaer ende X maenden, XV dagen. Hi quam seer avontuerlic ant paeus-

[p. 188r]

dom doer assistentie des conincx Philips van Vrancrijc. Hi worde in Gasscongen gevoert ende daer begraven. Ende dat paeusdom vaceerde II jaer ende III maenden, ende XVII daghen.

Die vermaerde Oerde van den Tempeliers worde onder desen paeus Clemens ghedestrueert. Ende die heren van der Oerden worden alleghaeder op enen dach int conincrijc van Vrancrijc gevanghen. Die overste meester van der Oerden worde mit noch een te Parijs ghebrant. Dye sake waerom en wort soe claer niet gevonden, dan dat die coninc Phillips van Vrancrijc uut hat ende nijt ende uut gijricheit doer ingeven van zommige zijnre officieren³³² qualic informeert was. Dese oerde hadde gestaen C ende LXXXIIII jaren, ende was rijc ende seer vermenicht, ende begaeft mit vele scone privilegien des Stoels van Romen. Ende als si dus onversienlicken waren gedestrueert, worden al haer goeden gegeven den heren van Sint Jans Oerden van Rodes.

In den jaer Ons Heren M III C ende VIII began die vierlicke ende heilige Oerde van Sint Jans, heren van Rodes onder desen paeus Clemens. Dat eylant Rodus mit noch V ander eylanden daer omtrent leggende, hebben si uut der Turcken handen gewonnen, daer si IIII jaer lang om vochten, ende behilden se tot opten dach van huden. Vele striden ende oerlogen hebben si gehat tegen die Turcken, daer si dicwils of triumpheerden.³³³

332 aldus C; officieren en AB.

333 dicwils tr umpheerden A; dicw ils umpheerden B [door plaatfout]