Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die strijt die in Duvelant ghesciede.
Dat XIII capitel.

Here Willem, grave van Oestervant, heeft die stede van Zijrixzee seer vast gemaect ende bebolwerct, daerin settende een starc garnisoen van wapentuers; ende is getogen in Hollant, ende heeft mit hulpe van sinen oom, biscop Gwije van Uutrecht, een groot heer van volc vergaedert uut Hollant ende Vrieslaent, ende uut dat Sticht van Uutrecht, opdat hi in groter mogentheyt ende crachte dye Vlaminghen³⁴⁷, die in Duvelant lagen, verdriven mochte. Ende als dat grote heer des biscops van Uutrecht ende grave Willems Duvelant genaecten, zijn enige jonge ridderen ende knechten uut vermetelheit uut die scepen opt lant ghespronghen, ende maecten een schutghevaert teghen den ballinghen uut Zeelant. Ende dye Hollanders mit des biscops volck sijn opten dijc gheclommen, ende hebben haer tenten daerop ghesleghen, omdat dye duystere nacht anstaende was. Die Vriesen, die niet en sliepen, sijn uutghetoghen, ende hebben zommige tenten ende husen van den ingeseten van

347 Vlamingghen AB.

[p. 191v]

Duvelant gebrandt ende berooft, ende zijn mit een groten roof wedergecomen in dat heer. Die van Duvelant dit ghewaer wordende, hebben si haer wapen genomen, ende zijn doer bekende toewegen desen Vriesen naghevolcht, ende zijn mit groten geruchten ende mit vervaerliken³⁴⁸ slagen op dat slapende heer gevallen, ende onsachteliken dat gewrect; want die onversienen anxst ende vreselike geluyt der vianden heeft dat Hollantse heer eer vernomen ende gewaer geworden mit roepen ende slagen dan mit den ogen te sien. Dye Hollanders ende Stichters mit die Vriesen ende andere vrome wapentuers aldus vreseliken uut haren slape ontwect wesende, hebben si haer wapenen angedaen, ende zijn haren vianden stouteliken te moete gegaen om te wederstaen ende uut horen tenten te keren. Mer dat en mochte hem niet baten, want overmits de duysterheit des donckeren nachtes, so en mochte die ene den anderen niet kennen; want die ene vrient ende maech sloech den anderen ter doot. O! beclaechlike duysterheit! Want doer u worde de edele vromicheit ende de vrome edelheit tonder gedaen, die doer dat schinen³⁴⁹ des blinkende zonnes behouden waer geweest. In desen strijt bleven jammerliken verslagen here Willem van Hoern, domproest van Uutrecht; Claes Persijn; Dirck van Haerlem; Dirc van Zulen; ende Sweer van Beverwaert, alle vrome ridderen ende schiltknechten, mit vele burgeren ende ondersaten des Stichts ende der Hollanders, uutgeseit dergeenre, die daer veel waren, ende int water verdronken. Die biscop Gwie van Uutrecht worde gevangen mit een grote menichte van ridderen ende andere wapentuers, ende worden in Vlanderen gezonnen, ende in sekere hoeden geset. Here Willem, grave van Oestervant, is terstont in een scip gegaen, ende is gevaren na Zyrixzee, ende is mit groter noot nauwelic ontgaen. Dese strijt gesciede omtrent Midvasten, int jaer XIII C ende IIII.

348 vervaerlikee AB.

349 scihnen AB.