Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den twedracht binnen Uutrecht.
Dat XV capittel.

Als nu biscop Gwije van Uutrecht in Vlaenderen ghevanghen lach, doen waren binnen Uutrecht twe partien, dye langhe tijt viantscap ende twedracht hadden gehat. Mer verhorende dat horen biscop ghevangen was, maecten si vrede mit malcanderen, ende sworen ende beloefden mit ede malcanderen

[p. 192r]

getrou te wesen, ende dye stat te bewaren ende te onderhouden in goeden state ende vrede, totter tijt dat hoir biscop van der vangenissen ontslegen ware. Mer dat geloef worde niet lange gehouden van der eender partijen. Want here Gerrit Bruken, ridder, worde voer zijn eigen doere geslagen; ende doe gingen die dootslagers voert, ende vingen here Jacop van Lichtenburch ende here Willem van Rodenburch, ridderen, zijn broeder, ende heer Willems soen ende heer Warner, ridder, ende setten se gevangen in Vresenburch. Ende corts daerna hebben si ghenomen here Jacop van Lichtenburch ende here Werner, ridder, ende brochten se in der middernacht op Sinte Katrinen plaets, ende slogen se doot. Ende mits desen is daer veel quaets opgestaen ende nagevolcht, van dootslagen ende andere misvallen, die daerna in der stat gescieden. Gwije Dampier dit vernemende, is van stonden an getogen mit gewapender hant, ende is gecomen binnen der stat van Uutrecht, ende heeft aldaer scouten ende scepen gheset, die uut sinen name die stat regeren souden, ende heeft seer neersteliken gearbeit an die ecclesie ende capitel van Uutrecht, dat men biscop Gwije ofsetten wilde, die gevangen was, ende dat si kijesen wouden tot horen biscop here Willem van Gulic; datwelke hy by avonturen soude vercregen hebben, en hadde here Witte, de bastaert van Haemstede, wilen grave Floris soen van Hollant, van Zijrixze op die zee tot Santvoert niet gecomen.