Hoe heer Jan van Renesse verdranck.
Dat XX capitel.
Doen die Hollanders wederom waren ghekeert van den strijt uut Zeelant, hebben si hem ghehaest om here Jan van Renesse te verdriven uuter stat van Uutrecht. Ende sijn daer gecomen, ende begonnen die stat an te vechten ende met schieten ende stormen te bevechten, verbernende sommige husen ende molens buten der stat, ende meenden here Jan soude uutgecomen hebben om dit te wreken. Mer here Jan was beducht verraden te worden, ende is heymelicken mitten sinen uuter stat gegaen om die Lecke over te varen, ende is doer vrese sijnre vianden in een cleyn sceepken gegaen. Ende also si mit swaer harnas verladen waren, ende haerre veel int sceepken waren, soe sijn si alle in die gront ghegaen ende verdronken. Dyewelcke van haer vrienden ende bekenden mit segenen worden gevischet ende begraven.