M III C XV.
Keiseren.
Ledovicus, hertoge van Beieren, worde keiser gecoren van een deel der koervorsten365 int jaer M III C XV; ende dat ander deel koren hertoge Vrederic van Oestenrijc. Waerom datter groten twist tusschen hem beyden was, VIII jaer lang. Sy hadden enen strijt tesamen, daer hertoge Vrederic gevangen wert. Hi wert te Romen gecroont, mer niet van den paeus of legaet. Dese Lodewijc wert namaels in den ban gedaen van den paeus Johannes die XXII, daer hi in starf als hi XXXII jaer hadde regneert. Hy hadde te wijf grave Willems dochter die III van Hollant, daer hi bi wan Lodewic; ende Lodewijc Otte, Steven, ende Willem ende Aelbrecht, graven van Henegouwen, Hollant, Zelant ende Vrieslant. Dese keiser Lodewijc wert vergeven van een hertoechinne van Oestenrijc, ende starf in den ban int jaer M III C ende XLVII; ende leit tot Monachom in Beyeren begraven.