Hoe die heren van Sint Jans Oerde eerst te Haerlem quamen.
Dat IIII capitel.
Int jaer Ons Heren M III C ende XIII, op Sinte Marien Magdalenen avont, doe quamen alre eerst binnen Haerlem die heren van den Hospitaliers Sint Jans Baptisten in haer huys tot Haerlem, welc huys ende cloester alreeerst here Jacob van Denemarken, biscop van Zuden ende wijbiscop van Uutrecht, ende comenduyr des huys van Sinte Catrinen tUtrecht, ontfanghen ende angenomen hadde van meester Gerrit van Tetroede, canonic tot Sinte Marien tUtrecht; ende heeft dat gefondeert ende gewijt in der eren Gods almachtich, Zynre lyever Moeder Marien ende Sint Jans Baptisten. Dye heren van den Tempeliers die buten Haerlem in die bosschagye woenden, syn gegaen mit alle haer goeden totten voorseyden huse van Sint Jans, doer raet ende toedoen des edelen mans, Willem van Egmont. Daerna, in den jaer dusent III C ende XVI, heeft dieselve here Jacob, biscop van Zuden een coninclike sale binnen Haerlem getymmert ende gemaect. Des jaers daerna heeft die voorscreven biscop Jacob van Zuden doen maken in datselve huys een scone verchierde kercke mit enen sconen omganc, ende worde des jaers daeran volmaect. In welke kercke God die Here, met Sine Lyeve Moeder ende Zijn voerloper Sint Jan Baptist seer geeert worden. Ende here Dirck van Bredenroede die goedertieren, beghaefde dese kercke mit enen sconen gulden kelke van claren finen goude.
Auteursrechtelijk beschermd