Hoe die goede graef Willem den coninc van Vrancrijc te hulpe quam.
Dat VII capitel.
In den jaer Ons Heren M III C ende XV quam coninc Lodewijc van Vrancrijc met groter heercracht in Vlaenderen, ende sette zijn tenten opten over van der Leye. Die goede grave Willem dit vernemende, heeft heervaert gheboden ende is te scepe gegaen, ende quam den coninc te hulpe, ende dede sijn pauweljonen setten op die Scelt. Mer overmits dat grote ende ongetemperde weer van reghen ende winde, moeste dye coninc dat lant rumen, ende liet die Vlamingen onghemoyt bliven, ende reysde weder in Vrancrijc. Die ghoede grave Willem sekerlic wetende dat dye coninc weder in Vrancrijc was gereyst, is met zijn volc getogen over die Scelt, ende verbrande alle die naeste dorpen in Vlaenderen, ende is weder ongescent tscepe gegaen, ende quam weder in Hollant.