Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van Johan van Diest, die XLV biscop van Uutrecht.
Dat XVIII capitel.

Na den doot biscops Jacobs van Oesthoern zijn dye capittelaers weder vergadert, ende koren eendrachtelicken mit gemenen wille ende consente Johan van Bronchorst, proest van Oude Monster, tot enen biscop van Uutrecht; dyewelke terstont dat bisdom bestont te regeren, ende des Stichts saken te onderwinden. Die hoge vasallen ende leenmannen der kerken van Uutrecht, als die hertoge van Brabant, die grave van Hollant, Reynout dye Swarte, regent des lants van Gelre, hebben notabele ambassaten gesonnen te Romen, den paeus oetmoedeliken biddende voer heer Jan van Diest, proest van Cameriken, dat hi hem wilde versien met dat open bisdom van Uutrecht. Die paeus Johan die XXII doer begeerten der voerseyder princen, heeft den voorseide Johan van Diest versien met dat open bisdom van Uutrecht; ende hi worde int hof van Romen gewijt, ende haeste hem doe neder te comen. Ende heeft vergadert een schoon

[p. 199v]

geselscap van heren ende knechten, ende is sedeliken in die stat ghecomen mit een scoen ridderscap, ende is na ouder seden geset in die biscopeliken stoel, ende is geconsacreert die XLV biscop van Uutrecht. Ende Johan van Bronchorst, die dat bisdom een luttel tijts hadde gheregeert, is weder ofgeset.

In ditselfde jaer worde int lant van Normandien een kint geboren dat twe meyskens scheen te wesen in een lichaem; van boven of totten navel toe warent twe personen ofte twe menschen, ende nederwaerts wast mer een persoen ende enkel. Ende dat twe versceiden vrouwen waren, sach men daer an: want zomtijts als dene lachte, screide die ander; als dene sliep, so waecte die ander. Ende dye ene starf wel een jaer voer dander; ende alsdoen bleef die ander gaen mit dat ander sware, dode lichaem, dwelc si niet langer verdragen en mochte, overmits den groten last ende stanc; ende si starf ten lesten mede.