Hoe die goede graef Willem Oest-Vrieslant wedercreech.
Dat XXVII capitel.
Op dese selve tijt so nam graef Willem op, dat hi die ongehoersamige Oest-Vriesen wederbrengen woude tot sijnre onderdanicheit. Ende dede bereiden veel scepen van oerlogen, die welken hi sende op de zee, ende namen enen groten roof uuten dorpen van Nyemarden ende Oudemarden in Geesterlant omtrent Staveren; ende wat Vriesen dye si opt water vonden, worpen si overboert ende verdrencten se. Ten lesten waren daer enige eerwaerdige abten ende andere notabile poorters van Staveren die desen strijt ende twedrachte opnamen, ende daer wort enen dach gheset om te spreken van paijs ende vrede binnen die stede van Haerlem, daer soeveel in gedaen ende gesproken worde, dat daer een vriendeliken paijs ende soene worde gemaect tuschen beiden in deser manieren: als dat alle die Vriesen die bi der rivieren der Lauwers wonen, souden gehouden wesen binnen twe jaren haer lenen te ontfangen van den grave voerseit; sine baeljuwen, scouten ende dienres souden si sonder enige wederseggen ontfangen, ende souden sinen rentemeesteren zijn tributen ende behoerlike thynse geven. Ende dese paijs aldus ghemaect wesende, thoonden die Vriesen eenen ouden brief ende register den grave Willem, bewisende mit hoedanigher feeste ende solemniteyte een graef van Hollant gehouden was in Oest-Vrieslant te comen ende aldaer van hoghen ende381 nootlicke saken recht ende justicie enen ygeliken te doen.
In den jare Ons Heren M III C XXX, opten XXVIII dage van julio, wast so groten eclipsis, dat die zonne midallen sere verduysterde ende verginc, ende die dach was doncker als die nacht.
Int jaer daernae, van XXXI, was Grote Tafelronde tot Uutrecht op Sinte Katrinen Velt.