Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van der oerloge tuschen heer Willem van Duvenvoerde ende dat Sticht.
Dat XXIX capitel.

In den jaer van XXXIII was een scout geheten Gysbrecht op die Nyevaert, diewelc dat scoutambocht aldaer bediende uut heer Willems naem van Duvenvoerde. Dese voerseyde scout worde dootgeslagen, waervan een groet rumoer ende onvrede ende veel quaets daerom in den Sticht gesciede. Ende in wrake van desen, quam heer Willem van Duvenvoerde om de smalicheit te wreken, ende verbrande dat dorp te Gein. Dye gemeente der stat van Uutrecht togen wederom, ende verbranden dat dorp van Nijevaert. Daerna heft here Willem een groet heer volcs vergadert uut die graefscappen van Hollant, Gelre ende Cleve, ende is gecomen in groter moghentheyt tot Renen. Ende aldaer sijn heer in ordinancye ghestelt hebbende, is hy getogen over Heimansberch, ende heeft een deel van dat dorp van der Horst verbrant. Willem van Boerstal, castelein van der Horst, heeft hem vromelic mit scieten ende werpen bescermt

[p. 202r]

teghen sine vyanden, ende behinderde sere dat si niet vorder en quamen. Here Willem van Duvenvoerde³⁸², die gheen instrumenten en hadde daer hi dat casteel mede mochte bestormen ende winnen, is ghetogen te Tuijl, daer hem die Zeelanders ende die Vriesen mit groot volc verbeidende waren; daer waren oec gecomen vele Brabanders ende Vlamingen. Johan van Diest, biscop van Uutrecht is hiertegen gecomen mit sijn Stichse heer, mit edele ridderen ende knechten; ende uut sine stat van Uutrecht, mit ontwonden bannieren ende blasende trompetten, ende woude desen heer Willem uut sinen lande ende Stichte van Uutrecht mit cracht verdriven oft enen bloedigen strijt met hem vechten. Als dese dingen aldus gescieden, is grave Willem haesteliken uut Henegouwen gecomen tot Dordrecht, ende geboot heer Willem op dye verboernisse van sine hulde ende gracie, dat hy sonder merren al dat heer ongescent weder soude brengen, ende dat hi in geenre manieren tegen den biscop hem vermate te stryden. Ende van stonden an uut ghebot des goeden graves, worden terstont alle die tenten opghebroken ende te scepe gebrocht, ende elc toech weder in den sinen.

382 duvennoerde AB.