Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van grave Willem, des goeden grave Willems zoon, ende was die XX grave van Hollant, Zeelant ende heer van Vrieslant.
Dat II capitel.

Ende als dese goede graef Willem gestorven ende begraven was, is sijn outste zoon, Willem, grave van Oestervant ende Henegouwen, geworden die XX grave van Hollant, Zeelant ende heer van Vrieslant, ende is met groter eren ende feesten in allen landen, steden ende dorpen ontfangen ende gehult geweest, met behoerliken ede als dat betaemt. Dese grave Willem hadde te wive genomen ende getrout bi zijn vaders tiden Johanna³⁸⁸ die outste dochter van den hertoge Jan van Lotteringe, Brabant ende Lutsenburch, die derde van dyer name. Mer si en hadden ghen kinder te samen. Dese grave Willem was een alten vromen

388 Jahanna AB.

[p. 204r]

strijtber ende oerloechs man, ende seer ter wapenen geneycht, ende heeft int eerste van zijnre dominatie ende heerlicheit sinen ridderliken naem seer verbreet ende bekant ghemaect.