Van dat grote ende feestelike hof dat grave Willem in Den Hage hilt, ende van zijn anderde reise in Pruyslant.
Dat IX capitel.
Die grave Willem, wesende in Den Hage, heeft aldaer gehouden een vorstelick ende princelyc hof, mit steken ende tornyren ende andere ridderlicke oeffeninge, acht dagen lang, betonende allen princen ende heren die daer gecomen waren sine excellente mogentheit ende rijcdomme. Ende dese feeste geeindet wesende, is daer gecondicht een ander hof van steken ende torneren in die stede van Beauys in Normandien, tot welken grave Willem is gereist mit een scoen gerit van paerden voer ende after hem rijdende, mit groten staet ende triumphe. Ende daer zijnde en hebben niet alleen zijn vrienden396 mer oec sine vianden, ende voert alle princen ende vorsten die daer vergadert waren, getuycht ende geseit openbaerlic datter geen vromer ende stouter ridder en was in der werlt, dan dese grave Willem. Daerna heeft hem grave Willem bereyt andermael mit een scoen ridderscap van paerden te trecken in Pruichen, om te wreken den laster Goods opten ongelovigen, ende om sinen name ende lof te vermeren. Dye nyewe tidinge van desen toecomenden397 grave ende zijnre princen ende heren int lant van Littouwen en is nyet alleen verbreet ende gehoert uut seggelyke woerden, mer oec vernomen mit experiencien ende ridderlike vromicheden. Want hi doerreet dat lant rovende ende brandende, slaende ende vangende; ende daer en was niement van hem verbercht, si en vloden al wech van sine toernicheit, ende bedreef veel quaets in den lande, ende brochte alle haer steden, sloten ende dorpen onder sine dominatie, ende nam alten groten swaren roef mit hem.