Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die grave Willem die stat van Uutrecht beleyde.
Dat XIII capitel.

In datselve jaer heft grave Willem opgenomen die stat van Uutrecht an te vechten, ende heeft die cracht zijns ridderscaps verghadert ende veel zoudenyers ende knechten angenomen, ende is gecomen mit anderhalf hondert dusent man vrome ridderen ende knechten, ende heeft die stat van Uutrecht rontom belegen, zijn tenten ende papiljonen daer opgeslegen, ende heeft doen oprechten XIII grote magnelen, daer hi dye stat mede woude destrueren ende vernyelen. Hi hadde in zijn heer tot zijnre hulpen enen hertoech, XIII graven, LII banre heren, II M VIII C ridderen. Daer waren oec mede vele edelen ende leenmannen des biscops van Uutrechts ende in den Stichte woenden, die doer begeerten grave Willems die stat van Uutrecht mede hadden ontseyt, ende haer vianden waren, ende waren mede in des graven hulp in den belegge; daer die princepaelsten dese of waren, als heer Sweer van Abcoude ende Gijsbrecht zijn soen; here Aernt van IJselstein; Johan, burchgrave van Montfoert; here Henric van Vianen; heer Gijsbrecht van Starckenburch; here Aernst van Uulven; here Vrederic uuten Hamme. Die grave Willem quam ende beleyde dye stat op Sinte Odulphus dach ende bevacht ende bestormde die ses weken lanc sonder ophouden mit menigerley instrumenten. Daertegen weerden hem die van binnen seer vromelic, slaende ende

[p. 208r]

werende de van buten met ghescutten ende stenen van haerre poerten ende muren, datter veel de onbehoedelic na der muren quamen, ter doot gequest ende⁴⁰¹ gescoten worden. Soe ist op een tijt geboert, dat dye grave Willem in der nacht an de statvesten quam, om te ondersoeken die diepten van der graften, eer dat hi sulcken wel bemuerde stat onderwinden woude te bestormen; ende hi wert mit eenre pijle van der muren in sinen anclauwe gescoten. Die grave wert terstont also ghewont in sijn tente gedragen, ende worde in corten tijt weder gesont gemaect. Here Robbrecht van Arkel heeft den biscop sinen broeder, de in vreemden landen lach, een bode gesonnen ende hem doen weten hoe swaerliken sine stat van Uutrecht van den grave van Hollant belegen was. Die biscop dit vernemende, is terstont nedergecomen, ende heeft mits hulpe here Jans Beadmont, grave van Boloys, grave Willems oem voerseit, enen vrede ende vasten pays tusschen den grave ende sine stat van Uutrecht gemaect in deser manieren, als dat V C burgers souden uuter stat comen met bloten voeten ende hoefden voer des graven tente, ende souden den grave te voeten vallen, hem byddende oetmoedelic om genade; ende souden noch also dicke alst den grave belyefde ende hy des an der stat versochte, hem te diensten comen binnen der Masen myt V C gewapender mannen op haer eigen stats costen. Ende daer wert oec uutgesproken⁴⁰² dat men een deel van der muren XX roeden lanc ter neder leggen soude; ende⁴⁰³ noch soude die grave in der stat hebben een strate daer hi in ende uut gaen soude tot sinen belieften. Ende hiet noch huden des dages der Hollanders Straet. Ende daer worde een bestant gemaect⁴⁰⁴ tot Sinte Martijns dach toe in den winter, tusschen den grave ende die stat; ende binnen dien tijt souden dye biscop ende die grave van Boloys die compositie van den payse int openbaer breder declareren ende uutspreken. Datwelke also niet en gesciede, want grave Willem op de Oest-Vriesen toech, daer hi verslegen bleef, als men nae horen sal. Grave Willem toech weder van der stat van Uutrecht op Sinte Marien Magdalenenavont. Waeromme men tot huden opten dach alle jaers een eerlike ende staetlyke processie om dye stat draget, mit crucen ende vanen, mitten reliquien ende heylichdommen, des dages na Sinte Marien Magdalenendach, lof lovende ende dankende mit groter devocien ende ynnicheit, dat Hi die stat voer alle plaghen ende anvechten hadde bewaert, ende voert mere van allen toecomenden plaghen, tribulatien ende teghenspoeden bewaren ende bescermen wil.

401 ende gequest AB.

402 gsproken AB.

403 nnd AB.

404 gegemaect AB.