Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoge Willem, grave van Oestervant, wederom quam in Hollant, ende van die wreetheit der partien.
Dat XIIII capitel.

Dese twe partien worden van dage te dage meerder in Hollant. Ende dat lant worde wredelic verdestrueert, vernijelt, verwoest ende verbrant; want dye ene roofde ende brande opten anderen, malcanderen vreselic slaende ende vangende, ende bedreven alsulke lelicke ende wrede feyten op malkanderen, des dyergeliken nye in Hollant te voren en was ghesien noch gehoert. Die Cabbeljaus senden boden ende brieven in Henegouwen an hertoge Willem⁴²² van Beyeren, grave van Ooestervant, die outste soen der keiserinnen, graefinne van Hollant, begerende ende versoekende dat hi vri in Hollant quame; ende name dat regiment der landen van Hollant an, want het was also geconcludeert ende gesloten, dat sij voertan in geenre manieren langer van der keiserinne, sijnre moeder, gheregeert en wouden wesen. Ende hoewel hy dat weygerde, nochtans en lieten si niet of, si informeerden ende onderwesen hem also, dat hi heimelic gecomen is tot Gorichom. Ende als de van Delft dat vernamen, togen si uut mit al hoer macht, ende brochten hem tot Delft, ende ordineerden hem te wesen haer capitein ende hoeftman; ende hi ghinc dicwils uut mit dye van Delft, ende verbrande vele dorpen, husen ende sloten, die de Hoecxs toebehoerden. Ende ten lesten hebben die steden van Hollant mitten Kermers ende West-Vriesen desen hertoge

422 Willlem AB.

[p. 213v]

Willem ontfangen voer haren prince ende grave van Hollant, hem doende enen eedt hout ende trou te wesen tegen wille, consente ende danck der keiserinne zijnre moeder. Als dat die heren van der Hoecxs pertie sagen, versagen si haer husen, sloten ende castelen, myt volc van wapenen, mit vitaelge ende mit als dat hem van node was, ende vertelden der keiserinne, ende claechden haer, wat groter cracht ende gewelt dat hemluden was gesciet van den partyen der Cabbeljaus. Die heren van der Cabbeljaus pertie, mit de steden van Hollant, sijn terstont na den vertrecken van den anderen, bieengecomen⁴²³, ende beleiden der Hoecxs castelen, sloten ende husen, ende die si wonnen staken si an brande ende beroefden se; ende dier wasser wel XVII binnen een jaer.

423 bi en gecomen AB.