Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den strijt opter Masen tuschen de moeder ende tkint.
Dat XVI capitel.

Hertoge Willem, als hi in Hollant gecomen was, heeft hi seer gearbeit om weder volc van wapenen te vergaderen, ende heeft weder hulp ende bistant gecregen van versch volc, ende heeft sijn moeder plaets ende dach geleyt ende beteykent, om weder tegen malkanderen te vechten op die Mase, tusschen Den Briele ende tsGravensande. Die hertoge heeft vergadert een groot machtich heer van volck uut Hollant, Kermerlant ende West-Vrieslant, mit veel heren ridderen ende schiltknechten, als heer Jan van Arkel; vrouwe Machtelt van Voorne, wedue van den here van Valkenburch ende Montiauwen; heer Jan van Culenburch; heer Jan van Egmont; heer Gerrit van Heemskerc; heer Gerrit van Harlaer, myt veel andere heren ende vrome knechten uut den lande van Cleve, van Gelre ende uut Hoech-Duytslant. Ende mit alle desen hoop is hi tscepe gegaen mit ontwonden bannieren ende wimpele⁴²⁴, myt trompetten ende basunen, ende is gevaren ten voerseiden plaetse, om mit groter crachte te wederstaen sine vianden, ende die tonder te brengen. Dese keyserinne heeft in haerre hulpe gecregen vele vrome wapentuers uut Engelant, Henegouwen, uut Zeelant ende uut Walcheren, met vele groter heren, baroenen, ridderen ende knechten, ende is als een onvervaert princesse, niet twifelende an der victorie te hebben tegen haer soen. Ende daer is ene grote, bitteren, swaren strijt begonnen; dat gecrij clam op ten hemel, ende si vielen stoutelic an malkanderen, vromelic vechtende om de victorie ende overhant. Daer worde ghehoert een vreselic geluyt in der luchten van den roepen ende gecrij, dat barsten der armborsten, tgeclanc der swaerden, tbreken der lancien, dat grijselic werpen der stenen, dat scoeren der scilden; want het was een dach des toernicheyts ende des wraecxs, want daer vele vrome⁴²⁵ wapentuers an beyde sijden gewont ende geslegen worden. Vele van hen die gewont ende gequest waren, hem segende mitten teiken des Heiligen Cruys, sprongen int water ende verdroncken. Ten lesten worde der keiserinne heer soe seer vermoeyt, ende gingen tonder. Dwelc siende die keyserinne is haestelyck

424 wimpale AB.

425 wrome AB.

[p. 214r]

getogen afterwaerts uuten strijde, ende voer in Engelant, tot haer suster de coninginne. Die overste capittein der keiserinnen, een Engels, worde daer geslegen mitten goeden here Costijn van Renesse; Floris van Haemstede, mit veel meer andere heren ende knechten. Ende daer worden gevangen van der keiserinnen sijde here Dyrc van Bredenroede, met vele ridderen ende knechten ende ander, de ontallyc waren. Dese slach ende bloetstortinge was so groot, dat dye Mase drie dagen lanc daernae ebbede ende vloiede root wesende, van den bloede datter ghestort was. Dese bloedige strijt gescyede op Sinte Martijnsdach te midsomer, int jaer M III C ende LI; ende ten lesten wort daer een compositie van paijs ende vrede gemaect tusschen de keiserinne ende haer zoen, als dat die keiserinne soude besitten haer leven lang dat graefscap van Henegouwen, ende hertoge Willem, haer soen, soude rustelic hebben ende houden die graefscap van Hollant, Zeelant ende Vrieslant. Ende dye keiserinne leefde hierna vijf jaer lang. Ende si starf in Henegouwen, ende leit te Valenchijn begraven.