Van den doot der keiserinnen ende grave Jans van Boloys.
Dat XV capitel.
Int voerseyde jaer worde oflivich dye doerluchtige vorstinne vrouwe Margriete, keyserinne van Romen, graefinne van Henegouwen, des goeden grave Willems dochter, moeder hertoghe Willems van Beyeren, palensgrave opten Rijn, grave van Hollant, Zeelant ende here van Vrieslant. Ende si worde mit betameliker uutvaert begraven tot Valenchijn in Henegouwen, nadat si die graefscap van Henegouwen438 na haers broeders doot regiert hadde X jaer, ende dye graefscap van Hollant, Zeelant ende Vrieslant omtrent V jaer. Ende doe quam die graefschap van Henegouwen ende van Hollant weder an enen heer, als hertoge Willem van Beyeren, haer soen. Ende in datselve jaer starf doe mede graef Jan Beamont, grave van Boloys ende Swessen, des goeden graven Willems broeder van Henegouwen ende van Hollant, ende der voerseider keiserinnen oem. Ende na hem worde grave sijn soen Johan, diewelke daerna mitten heren van Prusen van der Duytscher oerden reysde op die ongelovige heidenen, daer hi ridder geslagen worde. Hi hadde II sonen, als Jan ende Ghye, graven van Boloys ende Swessen.