Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van here Vrederic van Blanckenhem, biscop van Uutrecht, die LI.
Dat XLI capitel.

Here Floris van Wevelichoven, bisscop van Uutrecht, begraven wesende, opten XVIII dach dairna, quamen binnen der stat van Uutrecht dye grote mogende princen, hertoge Aelbrecht van Beyeren, grave van Henegouwen, van Hollant, Zelant ende Vrieslant, hertoge Willem van Gulick ende van Ghelre, grave van Zutphen, die hertoge Aelbrechts dochter te wive hadde. Dye capitelaers vergadert wesende, so bat hertoge Aelbrecht voir here Rogier van Bronchorst, thesaurier der kercken van Colen. Hertoge Willem die bat dat si wilden kiesen here Vrederic van Blanckenhem, biscop van Straetsburch, sinen neve. Die capitelaers anhorende die supplicacien der beyder princen, baden hen dat si wilden accorderen ende refereren hen tot enen bequamen persoen om te kyesen: si wilden gaern haer supplicacien ende begeerten volbrenghen. Die princen en wouden dat nyet doen, mer elck begheerde te hebben tot enen postulaet ende bisschop daer si voer baden, uuten welcken een grote tweedracht onder den capittelaers

[p. 232v]

ghecomen is, want dat meerredeel tot LV toe coren eendrachtelijcken tot begeerten hertogen Willems heere Vrederick van Blanckenhem, biscop tot Straetsburch, ende dat minre deel tot XXVII, coren tot begeerten hertoge Aelbrechts Rogier van Bronchorst voerseit. Ende terstont so sende elc van dien horen ambassiaten ende boden in den hof van Romen om te hebben die confirmacie. Mer Bonifacius, die IX paeus van Romen, gaf here Vrederick van Blanckenhem dye confirmacie, omdat hi dye meeste stemmen hadde. Dese here Vrederic was een wijs ende geleert man, ende hi quam mit een betamelicken ende sconen staet tot Uutrecht, ende worde aldaer na ouder manieren geordineert ende ghewijt die LI biscop van Uutrecht. Hij vant alle die sloten sijns Stichts vol ende wel versien van als des hem van node was, die zijn voersaet tegen sine ombelegen vianden wijslic wel defendeert ende bescermt gelaten hadde. Hi regeerde sijn Sticht ende landen lange tijt rustelic ende vrelic, sonder enige oerloge. Alle die burgers ontfingen van hem haer statrechten, ende sine vasallen ende leenmannen haer leengoeden. Dese eerwaerdige biscop was een grootmoedich man, wijs ende stout, seer discreet ende besceyden in rechtelicke saken, ghelt ende goet versmaende, ende in alle saken den ghemenen oerbaer ende profiten van den landen angaende was hi seer voersichtich.