Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den reyse des biscops van Uutrecht tegen heer Jan van Raesvelt, ridder, ende hoe hi die graefscap van Trenten ende stede ende tslot van Koeverden weder aen hem creech.
Dat XLIIII capitel.

Int jaer Ons Heren M III C ende XCIIII, als die grootmoedige heer Vrederic van Blanckenhem, biscop van Uutrecht, uut warachtighe relatien ende tidinghe hoerde die grote scade ende laster die heer Jan van Raesvelt, ridder, heer Bitters zoen, ingeseten des Stichts van Munster, sine luden ende ondersaten aendede in den Stichte ende sine landen van Uutrecht geseten, was hi des seer gestoert; ende is ghetogen mit sine scutten ende ander wapentuers tegen den voerseiden heren Jan ende sinen vader, heer Bitter van Raesvelt, wonende in den Stichte van Munster, over die riviere van der Lippe; ende verbrande dat dorp te Oestdorp, heer Bitter toebehorende. Ende al dat hi wiste hem toebehorende, gaf hy den scutten ende knechten te voren ende te roven, rovende ende pilgerende onsprekelike veel beesten ende alle andere tijtlicke ende rikelicke goeden, ende toech weder mit groter eren in sine landen.

Des tsjaers daeran, van XCV, dese biscop Vrederijc overdenckende hoe dat hi zijn bisdom soude moghen verbeteren ende verheffen in tijtlike goeden ende voerspoedicheden, heft hi vernomen uut sekere waerachtyge oude besegelde brieven, als dat die graefscap van tlant van Trenten mitter stede ende slot te Koeverden, toe plach te horen Sinte Martijn. Ende dat die ouders ende voersaten dergheenre diet nu besaten, dye voerseide⁴⁶² heerlicheden in voerleden tijden voer een seker

462 naar C; voersiende AB.

[p. 233v]

zomme van penningen op aldusdaniger condicien ende voerwaerden hadden beleent, als dat die biscop van Uutrecht altijt tot sinen belieften ende tot allen tijden ende stonden dese voerseyde heerlicheden soude mogen lossen met alsulken somme van penningen als daer op stonden; ende die biscop dede sine penningen presenteren dairt voir verset was, mer die casteleyn en woude se niet ontfangen; mer hi wilde op dat slot bliven ende behiltet voer hem. Waerom dat die biscop dede vergaderen vele uutgelesen vrome mannen van wapenen, van ridderen, knechten ende sciltknapen, ende is gecomen mit heer Willem van Abcoude, heere te Wijc te Duersteden, heer Jan van Brederoede, sijn swagher, heer Henric van Vianen, heer Jan van Renesse, van Reinouwen, mit groter heercracht int lant⁴⁶³ van Trenten, ende stelde sijn belegge met ontwonden bannieren voer de stede ende tslot van Coeverden. Dwelc siende heer Gijsbrecht van Bronchorst, heer van Burckel, ende Ghijsbrecht van Bronchorst, outste soen des heren van Batenburch, ende noch veel meer andere vrienden ende magen des casteleins van Koeverden, deden den biscop ontseggen, menende dat hi uut vresen des ontseggens van den belegge opbreken soude, hebbende speciael ende groot betrouwen opten hertoge Willem van Gulic ende van Gelre. Mer dit en vorderde hemluden niet, want van die tijt dye biscop dragende ende hebbende goeden moet dat hi noch victorie van den belegge crigen soude, dede hy dat slot ende die stede strengelicker ende harder beleggen, ende benaude se alsoe, dat si hem boden op te geven in des biscops handen ende genaden. Ende dese twist worde gedadinct, als dat die joncheren van Koeverden souden hebben ende ontfanghen van den biscop van Uutrecht alsulke penningen als haer ouders ende voervaders daerop beleent ende staende hadden, ende dye biscop soude weder hebben dat graefscap van Trenten mitter stede ende tslot te Koeverden.

463 lant AB.