Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die Vriesen derden mael rebelleerden.
Dat LII capitel.

Daerna, int jaer M ende CCCC, die Oest-Vriesen siende dat dye grave van Oestervant mit alle sijn heer weder uut Vrieslant was ghetogen, ende dat hi doir beveel sijns vaders gereyst was in Henegouwen, setten si nu weder op noch derden mael te rebelleren, boven horen eedt, zegel ende brief. Ende also die stede van Staveren noch onder die protectye ende onderdanicheit was van heren Floris ende heere Gherrit, ridderen, dye daerbinnen lagen mit veel Hollanderen ende knechten, hebben si vergadert alle hair macht uut Vrieslant, ende quamen⁴⁸¹ stouteliken voer die stede ende beleyden se mit groter macht. Hertoge Aelbrecht, die verwonderde sere van dese ingeboren rebelheit der Vriesen, heeft doen vergaderen uut alle sine landen uutghesochte ende cloecke vrome ridderen ende knechten mit veel volcxs van wapenen, ende heeft here Aernt van Egmont ende van Yselsteyn ende joncheer Walraven van Bredenroede gesonden in Vrieslant, om dye stede van Staveren te ontsetten. Ende als si overgecomen waren, terstont so verstroyde hem die Vriesen van den belegge gheliken

481 qnamen AB.

[p. 237v]

die roeck in der lucht, ende liepen elcxs sijns weechs. Dit gesciet sijnde sijn die Hollanders wedergekeert mit groter eren ende zege in Hollant, uutgeseyt joncheer Walraven; die woude daer noch mitten sinen een wijl tijts bliven. Daerna ist gheboert, in den somer des selven jaers, dat die Hollanders die binnen Staveren laghen op eenre nacht uutgegaen sijn, ende bestormden dat bolwerc buten Staveren, staende int dorp van Molkenhuys oft Molckweer. Mer si en bedreven niet, want joncheer Walraven worde daer mit allen seer ghequetst, ende worde van den Vriesen gevangen. Mer nyet lange daerna, also hi niet sere bewaert en worde van den Vriesen, is hi hen mit cloecheden ontgaen ende quam uuter vangenissen. In datselve jaer starf Katherina, hertoechinne van Gelre ende van Gulic, hertoge Aelbrechts dochter, sonder kinder; dat een goede ende sere devote vrouwe was, daer hertoghe Willem, haer man, sere droevich om was.