Van hertoghe Willem van Beyeren, die XXIIII grave van Hollant, Zeelant ende Vrieslant.
Dat II capitel.
Willem, hertoge in Beyeren, grave van Oestervant ende van Henegouwen, worde na sijn vaders doot die XXIIII grave van Hollant, Zeelant ende heer van Vrieslant. Alle die steden sijnre landen ontfingen van hem hare rechten ende privilegien, ende dye edele ende vasallen haer lenen ende leengoeden, ende die officiers haer diensten, ende worde ghehult ende ontfangen in allen landen ende steden alst ghewoenlic is. Hi hadde eerst in sine jonge jaren te wive Maria, coninck Kaerls dochter van Vrancrijc die VII, die desen jongen hertoge ridder maecte voer den Dam in Vlaenderen; mer si starf jonck. Daerna nam hi te wive hertoge Phillips Lehardi dochter van Bourgongen, grave van Vlaenderen, Artoys, etcetera, dair hi een enige dochter an wan, geheten Jacoba. Ende worde geboren int jaer M CCCC ende een, omtrent Sint Jacobsdach. Dese hertoge Willem was altijt seer geneycht tot die wapenen, ende was in sijnre tijt een glorioes ende ontsiende prince, groot ende lang van statuere, schoen van lichaem, wijs ende cloeck in striden ende oerlogen, ende seer victorioes; rechtvaerdich in justicie te doen; milt ende goedertieren tegen den armen.