Hoe die Vriesen weder rebelleerden tegen hertoge Willem.
Dat XV capitel.
Int jaer Ons Heren M CCCC ende XIIII, doe bestonden die Vriesen weder op te staen tegen hertoge Willem horen here, ende vergaderden al heimelic een deel volcx, ende quamen in der nacht voer Staveren; ende also die wakers niet al te scarpe wake en hilden, beclommen si die stede ende vingen vele van den Hollanders, die si rantsoneerden ende scatteden tot haren wille. Ende dye stede van Staveren hadde omtrent XIII jaer geweest ende gestaen onder die dominacie van den grave van Hollandt. Dit toernde hertoghe Willem seer, ende nam op dat hi die Vriesen also te nyete maken soude ende clein, dat si ghenen macht meer hebben souden hem te wederstaen; mer want hi op die tijt mit andere nootlicke saken becommert was, so vertoefde hi dat tot op een ander tijt.