Skiplinks

  • Tekst
  • Verantwoording en downloads
  • Doorverwijzing en noten
DBNL Logo
DBNL Logo

Hoofdmenu

  • Literatuur & Taal
    • Auteurs
    • Beschikbare titels
    • Literatuur
    • Taal
    • Limburgse literatuur
    • Friese literatuur
    • Surinaamse literatuur
    • Zuid-Afrikaanse literatuur
  • Selecties
    • Onze kinderboeken
    • Basisbibliotheek
    • Tijdschriften/jaarboeken
    • Naslagwerken
    • E-books
    • Publiek Domein
    • Calendarium
    • Atlas
  • Gebruiksvoorwaarden
    • Hergebruik
    • Disclaimer
    • Informatie voor rechthebbenden
  • Over DBNL
    • Over DBNL
    • Contact
    • Veelgestelde vragen
    • Privacy
    • Toegankelijkheid
  • Verantwoording
  • Inhoudsopgave

Downloads

PDF van tekst (7,69 MB)






Editeur
Aarnoud de Hamer



Genre
non-fictie

Subgenre
kroniek
non-fictie/geschiedenis-archeologie


© zie Auteursrecht en gebruiksvoorwaarden.

 

Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

(2011)–Cornelius Aurelius

Vorige Volgende

Hoe die keiser Segemont nederquam om dat oerloge ende discoorde te versoenen tusschen den coningen van Vrancijc ende Engelant.
Dat XVIII capitel.

Des jaers daeran, omtrent Paesschen, is in dese Nederlanden gecomen die keiser van Romen, Segemont, coninc van Ungarien, Dalmacien, etcetera, opdat hi dese II machtighe coningen van Vrancrijc ende Engelant soude mogen versoenen, tot dien einde datter eendrachticheit comen mochte in der Heiliger Kercken; om welke saken wille die keiser vriendelike brieven screef, ende notabele boden sant, tot den doerluchtige prince hertoge Willem van Beyeren, grave van Henegouwen, van Hollant, Zelant ende Vrieslant, begerende dat hi hem assistencie ende behulpelicheit in deser saken doen wilde. Die hertoge was terstont bereit, ende is den keyser te gemoete gegaen in die stede van Dordrecht; ende alle dinc bereit wesende506 ende tot deser vaert dienende, sijn si tesamen te scepe gegaen opten IX dach van meye, ende sijn gecomen in Engelant. Hertoge Willem was daer bi den coninc omtrent XL dagen, mit groter costen ende eerlicheit, want hi hadde in sijnre familie XIII baroenen ende ridderen, die alle dage mit nyewe gulden lakenen gecleet worden ende mit grote uutnemende costelike gouden ketenen ende andere spannen verciert waren. Ende het quam so verde, dat men wel enen goeden manier om pays te maken gevonden soude hebben, mer overmits des duvels boesheit en condet tot genen effecten ende tot enen goeden einde comen, want alle die gemene luden ende ondersaten van der cronen van Engelant meenden bedrogen te worden doer die vreemde heren van buten, ende en wouden niet alsulken tractaet, als dair onder den heren gesloten was, voertganc hebben soude. Waeromme datter een groet rumoer ende twedracht onder den volcke opgestaen is, also dat die heren ende princen in groten laste ende benautheit waren. Waeromme dat die hertoge gegaen is totten coninc van Engelant, ende seide hem aldus: 'Ist sake dat ghi voertan so vermetel sijt ende koen, dat ghi oerloge voirt tegen den coninc van Vrancrijc, ghi sult minen standaert ende banniere sien staen tegens u.' Dit gheseit wesende,

[p. 252r]

ghinc die hertoge te scepe, ende doer ingeven van enige viel hi op sine knyen, ende anriep Onse Lieve Vrouwe, belovende haer te versoeken in die Polre bi der Veer, daer si grote miraculen doet, ende beloofden geen vleys te eten voir dat si Onse Lieve Vrouwe in die Polre hadden versocht. Ende so geringe si dye bedevaert hadden beloeft, terstont binnen II uren cregen si enen goeden wint, ende quamen in XXIIII uren uut Engelant in Zelant, ende ghingen van stonden an, ende volbrochten ende deden die bedevaert. Ende die keiser is wederom gereist in Duytslant int concilium van Constans, ende dair worde dat graefscap van Cleve gemaect een hertoechdom, ende Adolf, grave Adolfs sone, worde ghemaect dye eerste hertoge van Cleve ende van der Marck.

506
wesdnde AB.

Vorige Volgende