Van dat derde huwelic dat vrou Jacobe dede.
Dat XXVI capitel.
Hier te voren heb ic gescreven hoe dat vrou Jacobe van zommige raetsluden geinformeert was, dat al sulken huwelic als tusschen hair ende hertoge Jan van Brabant ghesciet waer, niet wettelic wesen mochte. Ende dat dye bullen van der dispensacien gepasseert niet warachtelic, mer valsch waren. Waerom dat si opten VII dach van maerte, int jaer M IIII C XXIII getogen is uut Henegouwen in Engelant, ende dair sijnde heeft si te Romen doen cijteren hertoge Jan van Brabant, allegerende ende seggende dat tusschen hair ende hem geen wettich huwelic en ware; soedat die paeus Martijn voerseit die sake commiteerde twe cardinalen, die den hertoge deden dach besceiden tegen hair, soedat hertoge Jan bi rade des lants van Brabant ende Henegouwen sekere procuratuers int hof van Romen gestelt heeft om sijn saken te defenderen ende te verantwoerden. Als vrouwe Jacobe dat sach, ende verbeyde sij niet tvonnis der Heiliger Kercken, mer is haestelic versellet mitten hertoge van Cloucester, des conincs broder Henric, die op condicien, waert sake ende so veer dat dat huwelic voerseyt niet wettelic ware ende dat op alsulken huwelyc als si daer van nijewes weder daden dispensacie van der stoele van Romen mochten vercrigen, want si malkenderen bestonden in den lesten grade uut die gheboerte van Philippe, coninginne van Engelant, des goeden grave Willems dochter van Henegouwen, ende Margriet, der keiserinnen suster moeder van hertoge Aelbrecht haren oude vader. Ende van desen huwelic sijn den landen namaels vele scaden gecomen, dwelke dye coninc van Engelant ende hertoge Philips van Bourgongen gaern belet hadden, ende sonden an hertoghe Jan van Brabant haer ambassiaten, versoekende an hertoge Jan, dat hi hem wilde submitteren an den voerseyden coninc ende hertoge, om die sake int hof van Romen, hangende bi rade van notabele clercken ende geleerden te terminen bi consente ons Heylichs Vaders den paeus. Int welke die hertoge sijn consent gedragen heeft soverre hi vermochte, behoudelic dat vrou Jacobe oec so dede. Mer vrouwe Jacobe, noch die hertoge van Cloucester en woude dit niet doen. Ende hertoge Jan sandt sinen heraut in Engelant om alle saken te vernemen, welken heraut die hertoge van Cloucester vangen dede ende ter coerden trecken; mer ten lesten ontquam hy mits hulpe des cardinaels van Engelant, dair hi mede ten Heylighen Lande hadde gheweest. Corts hyerna quamen sekere nije maren, hoe dat de hertoge van Cloucester gecomen wesende mit vrou Jacobe uut Engelant tot Calis reysde mit groter macht, dach ende nacht, om tlant van Henegouwen in te nemen. Ende hadde sijn volck ghedeelt in drien bataelgen, soedat in die voerhoede waren omtrent M paerden. Ende tusschen beiden was die hertoghe ende vrou Jacobe mit XV C paerden, so datter waren V M paerden. Ende vrou Margriet, haer moeder, dede bidden ende scriven den edelen ende haren vrienden al Henegouwen doer, dat si mit haer ryden wouden om haer dochter te ontfangen. Ende in deser manieren is dese hertoge van Cloucester mit vrouwe Jacobe int lant van Henegouwen gecomen, sonderlinge by favoer ende gonste des heren van Haverets. Dye nochtans van hertoge Jans wegen van Brabant cappetein dair geordineert was, dye den hertoge mit zommighe edelen contrarie vielen; mer die meeste ende machtichste van Henegouwen bleven hertoge Jan getrouwe ende onderdanich, soe si sculdich waren van doen. Ende hertoge Jan sende minlike brieven an hertoge Philips van Bourgongen ende an hertoge Jan van Beyeren, zijn neve, om assistencie ende bistant, dwelke si geloefden te doen; want hertoge Philips sende den heren van Croy, den here van lIlle Adam, heer Andries van Velli, mit vrome cloecke strijtber mannen. In ditselve jaer worde heer Jan van den Vliet in tsGraven-
Auteursrechtelijk beschermd