Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dye stede van Scoenhoven belegen worde, ende van den scermutsinghen die dairvoer gevielen in den belegghe.
Dat XXIX capitel.

Des jaers daeran van XXV, heeft joncker Jacob van Gaesbeec, stedehouder van Hollant, doen bannen uuten lande van Hollant alle dye adversanten ende wederpartije des hertoghen van Brabant, ende heeft in die Vasten dairna, int selfde jaer, vergadert veel volcx van wapenen, ende

[p. 269v]

heeft die stede van Scoenhoven al om beleit mit die gemene poerters der steden van Hollant, Zeelant ende Vrieslant, uutgeseyt die stede van der Goude, Oudewater, Briel ende Zijricxzee, die hem des oerloges niet intromitteren noch onderwinden wouden. Soe hebben si dan de stede van Scoenhoven tot allen plaetsen beleyt, ende die stede bleef gesloten XXIIII weken lang; ende die van buten scoten mit grote bussen ende andere instrumenten mit allen seer op die stede. Die poorteren⁵⁶⁵ hadden binnen der stede vijf ridderen ende XX jonckeren, alle vrome oerloechsmannen, die die stede bewaerden, ende quamen dickwils uut in dat heer, ende hadde vele scermutsinge ende deden menige sproncreise int heer, mit hem nemende een groten roef ende gevangen, ende keerden weder in die stede. Daerna geboerdet, dat zommige uutgelesen vrome mannen van wapenen by nachte uuter stede gingen, ende quamen voer dye stede van Rotterdam, ende daer vele scepen mit goet geladen, ende voerden die de Lecke op, tot Scoenhoven. Die van Rotterdam dit vernemende, vergaerden terstont alle dye vroemste poorteren van der stede, ende volchden hem na mit groten gelude van trompetten ende mitter stede bannier, om hem den roef mit cracht te benemen oft voer al sulken laster ende scande enen bloedighen strijt mit hem te vechten. Soe ist dan dair voer die stede tot enen stride gecomen, ende dair gesciede enen groten slach. Mer ten lesten keerden die van Rotterdam den rugge, ende daer worter mit allen veel geslegen. Die van Scoenhoven dye victorie vercregen hebbende, worde die stat van Rotterdam daer mit meer andere porteren ende mitter stede bannier gevangen gebrocht binnen Scoenhoven mit groter triumphen ende blijsscappen. Ende als dye edelen ende steden van Hollant XXIIII weken lang voer die stede hadden gelegen, ende si sagen dat si niet veel bedreven, ende dat si de stede also niet machtich en mochten worden, sonden⁵⁶⁶ si notabele ambassiaten an den hertoge van Cleve ende an den grave van Moers⁵⁶⁷, dat si souden comen ende maken een bestant van VI weken lang gedurende, opdat elck dan te bet ende lichtelicker te huys mochte trecken; dwelck also is gesciet. Ende dat belegge is opgebroken omtrent Sint Jansdach Onthoefdinge.

565 poorteten AB.

566 souden AB.

567 Moees B; in A is de tweede e beschadigd.