Hoe dat die stede van Sevenberghen belegen worde ende die here van Sevenberghen verdreven.
Dat XXXIIII capitel.
Hertoge Philips siende dat dye fortune hem medeging, nam voir hem dat hi alle sine adversanten over al Hollant tot sijnre subjectie ende onderdanicheit brengen wilde. Ende also die heer van Sevenbergen op die tijt vrou Jacobs partie was ende mit haer hylt, so heeft hi die stede belegen XIIII weken lang, mit veel volcks van wapenen, te water ende te lande; ende dit was in den winter, een luttel tijts na den strijt van Brouwershaven. Daerna, bi middele van des heren van Sevenbergens vryenden, worde daer een bestant gemaect tusschen hem beyden. Binnen den tijt van desen bestande sende die hertoge joncheer Jacob van Gaesbeeck, regent ende stedehouder van Hollant, des heren van Sevenbergens neve, totten selven here van Sevenbergen, offererende ende presenterende, wairt dat hi stille woude sitten, neutrael, ende hem des oerloges niet onderwinden, hy wilde hem geven een grote zomme van penningen; ende de hertoge soude van den belegge opbreken behoudelic waert sake dattet geviel dat die hertoge een opennen strijt tegen der hertoechinne vrou Jacobe vechten wilde, dat hy alsdan assistencie ende bistant soude mogen doen denghenen diet hem beliefde. Mer wat men hem presenteerde oft riet, hy versmadet altesamen, ende en woude nergens na horen; want hi woude ten uuterste bliven by sine lantsvrouwe. Waerom, als dat bestant uut was gegaen, so dede die hertoge die stede vaster ende nauwer belegghen dan te voren, dat dair niement in noch uut en mochte. Ende alsoe die heer van Sevenbergen sine ondersaten van der stede seer moyelic ende lasterlic was in scattinge, ende si anmercten datgene dat haren here gepresenteert was, soe hebben si die stede tegen zinen wille ende dancke opgegeven in des hertogen handen. Ende die heer van Sevenbergen ging van den huse mit sine soudeniers, ende gasten, mer op wat condicien dat laet ic staen. Mer hi beclaechde hem seer, dat men sine voerwaerden niet en hilt; ende most dolen, ende starf in armoeden. Ende die hertoge quam in die stede ende op dat slot, ende wort daer minlic ontfanghen.
Auteursrechtelijk beschermd