Hoe die vierlike hoechtijt van Sinte Jeroen ingeset worde.
Dat XLII capitel.
In den jaer Ons Heeren M CCCC XXIX, doen was binnen der stede van Leyden heer Sweer van Culenburch, biscop van Uutrecht; ende verhorende die grote miraculen ende wonderlicke teykenen die gescieden doer den heiligen priester ende martelaer Sinte Jeroen, de opten XV dach van der maent november int dorp van Noortwijc, buten Leyden, voer dat Heylige Kerstengelove van den Denen ende Noermannen wredeliken was gepinicht ende onthoeft in den jaer als men screef VIII C ende L, so heft dan dese eerwairdige biscop dese hoechtijt van Sinte Jeroen ingeset te vyeren doer dat lant van Hollant opten XVII. dach des maents augusti, dat is op die octave van Sinte Louweris. Die miraculen die God almachtich dagelicxs doet doer desen heiligen priester ende martelaer, sijn wonderlicke veel, ende bysonder van verloren goeden, dye weder ghevonden ende vercregen worden. Waerom datter groot versoeck is tot sinen grave ende heylighe reliquien, van pelgroms uut allen landen daer comende.
Auteursrechtelijk beschermd