Hoe dat Lodewijc die dolphijn van Vrancrijck uut Vrancrijck tot hertoge Phillips quam.
Dat XXIX capitel.
Op dese tijt, als hertoghe Phillips voer Deventer lach, so is daer grote twist ende geschille opgestaen tusschen coninc Kaerle van Vrancrijc ende Lodewijc den dolphijn60 sinen soen. Die dolphijn leide vast over werwerts dat hi hene trecken woude, als totten coninc van Engelant, ofte tot hertoge Phillips van Bourgondien, sijn neven; ende is gecomen mit weinich gesins ende familie bi den hertoge van Bourgondien. Die hertoge dit vernemende, brac terstont sijn belegge op, ende haeste hem treckende na Brabant, ende ontfinc den selven dolphijn mit groter eren ende reverencien, ende behilt hem bi hem omtrent V jaer lang, totdat sijn vader die coninc ghestorven was, tot sijns selfs costen, als die prince hem gheordineert hadde; ende tracteerde hem mit groter eren ende feeste, ende beminde hem gelijken oft sijn eygen zoen ende broeder ware gheweest, ende hadde hem een bequamen staet van sijnre familie gheset ende gheordineert, als een dolphijn ende toecomende coninc betaemde. Coninc Kaerl dit vernemende, nam dat swaerlic ende seer oevel van sinen sone ende van den hertoge, ende was daeromme seer ghestoert, ende was in meninghe hertoge Kaerl van Aquitanien ende na hertoge van Berry, sinen joncxsten soen, coninc na hem te maken.