Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier beghint die XXX divisie ende heeft XCIII capitelen.

Paeusen.
Anno M CCCC ende LXXI.
Dat I capitel.

Sixtus dye IIII was uut Ligurien, ende sat XIII iaer. Hi was een seer gheleert ende expert man in der Heiligher Scriften, van der Minrebroederen Oerde. Hij dede veel timmeren in der stat van Romen, ende bysonder dat Hospitael ofte Gasthuys¹¹⁰ van den Heyligen Gheest, begavende dat mit vele costlike gracien ende oflaten ende uutnemende schone juwelen ende cleinoden. Hi was een man van goeden leven ende gheruchte; nochtans had hi vele detraheerders ende benyders. Ende na vele doechtlike wercken starf hi te Romen, ende wert mit groter pompen ende wenender uutvaert begraven in Sinte Pieters Kerck.

110 aldus C; hospitael AB.