Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Lukenaers nu ten vierden male teghen hertoghe Kaerle rebelleerden ende opstonden.
Dat XVI capitel.

Hierenbinnen dat dese dingen hem dus hadden tusschen desen II mogenden princen, ende dat die ghemene fame ghinc dat die coninc so machtich in den velde lach ende so groten volc van wapenen by hem hadde, dat hij machtich ware den hertoge te verdriven, ende alle sine landen in te winnen, soe hoepten die ballingen van Ludick dat die hertoge nimmermeer weder levendich uuten stride comen soude, ende ontboden weder here Vincent van Bueren, here Jan die Wilde ende meer ander, ende maecten die hoer overste cappeteinen ende hooftluden van alle hoer vergaderinge ende menichte, ende hilden concilie ende spraec mit malcander, wat hem nu van node ware te doen; ende concludeerden gemeenlic tesamen dat si mit alle hoer macht trecken wouden ter plaetsen van daer si dus lange ballinc ende verdreven waren geweest. Ende sijn in desen selven jare van LXVIII des dages na Onser Liever Vrouwen dach Gheboertenisse gecomen mit VI C mannen al heymelic ende subtijllick binnen der stadt van Ludic, want se noch al gheslecht lach, soedatter goet binnen te comen was, ende oec mede datter vele binnen der stadt waren, die haer incoemst verwachtende waren. Ende incomende wert daer een groot rumoer in der stat, den enen burger tegen den anderen opstaende, ende verdreven se weder uuter stat ende sloegender oec vele doot die hen contrarye geweest hadden, ende en spaerden niement, gheestlic noch waerlic, out noch jong, ende alle dat die hertoge geordineert ende ingeset hadde, casseerden si, ende en woudens niet onderhouden. Ende leiden menige lagen om den oversten ende regenten van der stat te vangen

[p. 319v]

ende dat lijf te benemen; mer si ontquamen mit groter behendicheden, ende vloden uuter stat. Ende si vingen onder andere enen eerwaerdigen ende geleerden man, doctoer in beyden rechten, dien si jammerliken mit enen swaerde doer sinen hals staken, ende moerden; ende den secretarius van der stat hadden si mede gevangen ende seer gequetst; die ontquam mit groten listen, ende quam tot Pyronen, bi hertoge Kaerle dien hi openbaerde ende bliken dede, mit verschen wonden, wat binnen der stat van Ludic geschiet was. Ende binnen desen tiden quamen vele van den ballingen ende rebellen weder in der stat van Ludic, ende bedreven alle quaet dat si mochten. Ende daer vergaerde een grote menichte van veel lichts geselscaps uut allen landen, ende vermenichvoudichden sere. Die stat van Aken, die omtrent V milen gelegen is, senden die van Ludic sommige bussen ende andere instrumenten om hem tegen den hertoge te defenderen ende bescermen; ende theeft henluden seer voerwaert een wijl tijts gegaen in allen dingen ende saken. Ende also die stat noch sere destrueert ende verwoest lach, sonder muren ende poorten, hebben si seer naerstlic gearbeit, dach ende nacht, omme die stat te bebolwercken, ende maecten dair een grote, hoge walle om van aerde, ende brochten oec¹³³ mede te samen veel stenen, makende grote hopen voer die poorten, dat men niet lichtelic doir die wegen comen mochte totter inganc van der stat. Ende maecten noch al omme die stat grote ende hoge sware blochusen van houte ende balcken, in manieren van toernen, om die stat daerof te bescermen, ende vergaerden vele zoudeniers uut allen landen, ende versagen hem van vitaelge ende provande, ende van alle des hem van node wesen mochte, oft si tot eniger tijt weder beleyt worden; ende bereiden hem gansselic dairtoe, mit alle hoer macht te resisteren ende te wederstaen hertoge Kaerls mogentheit, bet dan si tjaer voerleden gedaen hadden.

133 oc AB.