Hoe dat hertoghe Kaerle mit groter feesten ende triumphen sijn ouders gebeenten dede transfereren ende brengen totten Chartroysers buten Dygion, in Bourgondien.
Dat LV capitel.
Een wijl tijts hier tevoren, als in den jare M CCCC LXXIII, heeft die mogende prince hertoge Kaerle van Bourgondyen gesonnen here Adolf van Cleve, here van Ravenstein, mit C edelen, alle gecleet mit lange, swarte tabberden ende rouwe mantelen totter stede van Brugge, om te transferen ende vandane te halen die gebeenten des mogende hertoge Phillips van Bourgondyen, sijns vaders, die aldaer tot noch toe boven aerde hadden gestaen, ende dat mit groter feesten ende triumphen te brengen totten Chartroysen buten Dygion in Bourgondyen, daer dieselve hertoge Philips in sinen leven enen costliken ghegoten metalen tombe hadde doen bereiden, om daeronder begraven te worden. Die here van Ravenstein heeft dat ghebeent sijns oems, hertoge Phillips, genomen van der stede daert dus lange gestaen hadde, ende wert geset mits in der kercken van Sinte Donaes, mit veel kaersen ende toortsen, mit alle die bannieren ende wapenen sijnre landen ende generacien, overdect wesende mit een swart gulden laken, mit een groot root cruys daerover, daerop leggende sijn swaert. Voer ende achter hingen sijn helme ende wapen. Ende daer worden sere feestliken ende devoteliken gedaen die vigelye ende misse van requiem; tot welcker exequien vergadert waren alle dye abten, proosten, dekenen, prelaten ende edelen des graefscaps van Vlaenderen in groter menichten. Ende dat officie van der exequie ghedaen ende gheeindet wesende, worde dat lichaem met veel toortsen ende kaersen gedragen mit groter pompen ende waerdicheden buten der stat van Bruggen, ende wert op eenen wagen gheset mit VI paerden, alle overdect mit fluweel. Die strengen van den wagen waren van swarte side ghewrocht, ende wert aldus mit groter eren ende pompen gevoert binnen der stede van Ghent, daer sine exequien ende uutvaert mit groter solemniteiten gehouden worden. Vandaen wert hi gebrocht tot Denremonde; ende sine uutvaert daermede eerliken gedaen wesende, wert hi gevoert op dye palen van Brabant tot Assche, daer alle die abten, proosten, prelaten ende edelen van den hertoechdomme van Brabant vergadert waren, ende brochten dat tot Brusel in Sinte Goedelen kercke, daer sine exequien mit groter waerdicheden ende feeste mede gehouden worden; ende wert vandane gevoert tot Namen. Dat officie voleint wesende, wortet voert gevoert mit groten gheselscappe van geestlike ende waerlike mannen tot int cloester van Gemmeloers, ende bleef daer staende tot dat lichaem ende gebeenten der hoechgeboernen vorstinne vrou Ysabele, hertogen Phillips gheechten huysvrouwe gebrocht wert int selve convent. In allen scine ende manieren als die exequien gescieden van hertoge Phillips worden dieselver in ghelijker manieren gedaen int cloester van Gonnay in Artoys, daer die hertoechinne oec dus lange boven aerden gestaen hadde, van denwelken te doen commissie ende beveel hadde here Jacob van Lutzenburch, des graven broeder van Simpol, mit veel andere baroenen, heren, ridderen ende prelaten des lants van Artoys, ende wert vandaen gevoert ter Vueren, ende vandaen tot opten frontieren van Henegouwen, daer alle die abten, proosten, prelaten, baroenen, ridderen ende edelen van den lande van Henegouwen vergadert waren, ende brochten dat mit groter eren ende waerdicheden tot Lens; van Lens tot Duway; van Duway tot Valencijn; van Valencijn tot Bergen; van Bergen tot Bins; van Bins tot Floryer, ende vandaer tot int cloester van Gemmeloers. Ende die feeste van der exequien dair volbrocht wesende, worden beyde die lichamen vandane
Auteursrechtelijk beschermd