Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die doorsichtige vorstinne, vrouwe Marie, die princesse, oflivich worde ende starf.
Dat XLI capitel.

In den jaer M CCCC ende LXXXII in dye Vasten heeft die edele princesse ende hertoechinne een recreacie willen nemen, ryende op een teldener int velt om te jagen; ende by groten ongevallen ende quader fortunen is si van den paerde ghestort, dat si dairof een abstonie in den live creech, dat si in groter siecten ende qualen gevallen is, ende is corts dair van deser werlt gesceyden opten XXVII dach van maerte; van wiens doot die edele prince hertoge Maximiliaen uutermaten seer bedroeft was, want si malcanderen binnen horen leven gansselic ende hertelic bemint ende lief gehat hadden; ende wert mit groter uutnemende rouwen ende droefheden begraven mit behoerlycker uutvert tot Brugge in Sinte Donaeskerke in Onser Vrouwen choer, nadat si mit malcanderen in echtlicken state geleeft hadden IIII jaer ende een half, ende si de graeflicheit van Hollant, Zeelant, Vrieslant ende hair andere landen hadde regeert vijf jaren, XI weken ende IIII dagen, afterlatende een soen, gheheten Philips, die geboren

[p. 387r]

wert int jaer M CCCC LXXVIII ende na coninc van Castilgen wert, als noch geseyt sal worden, ende een dochter genoemt Margriet, dye geboren wert int jaer M CCCC LXXX, de eerst versekert was by tractate van payse coninc Kaerle van Francrijc, die VIII van dyer namen; mer dit huwelick wert casseert ende te nyete ghedaen. Na nam si te man coninc Fernants ende Elisabeth, conincginne van Spangen, enyge zoen, ghenoemt oec Fernant, dair si een zoen bi had; mer si storven beyde binnen³²³ tsjaers. Na desen nam si te man Philibert, die VIII hertoge van Savoyen; mer si en hadden gheen kinder te samen, ende hi starf oeck binnen VII jaren dairnae, als M CCCCC IIII. Noch hadde vrouwe Marie een soen genoemt Franciscus, int jaer M CCCC LXXXI, ende starf corts daerna in dye wieghe.

Int selve jaer van LXXXII begonnen dye van Amstelredam een mure te leggen ende te maken om die stede de tot noch toe onbemuert hadde geweest, ende en hadde niet dan poorten ende toornen ghehadt mit een walle ende diepe graften, dwelke muir si in corten jaren volbrocht ende opghetymmert hebben.

323 binnin AB.