Gheestelycke rym-konst

[p. 86]

Lof ende danck-segghinghe tot Godt den Vader.

OGodt, wy willen V gaen dancken ende loven;

Maer Ghy gaet onsen danck en onsen los te boven;

Den lof met dat Ghy zijt, den danck met dat Ghy gheeft;

Want Ghy vergunt ons al dat uwe volheyt heeft.

Ghy hebt ons inghestort de goeden der natuere,
Die ghy eerst hadt verdeylt in gansch u creatuere;

Het wesen vanden steen, het leven vande plant,

De sinnen vande beest, der Enghelen verstant.

[p. 87]

 

Daer boven hebt ghy ons tot u natuer verheven,

 

En u ghenadigh saet der saligheyt ghegheven:

 

Iae (dat u groote min doet blijcken aldermeest)

 

Ghy gheeft ons u wen Soon, ghy gheeft ons uwen Gheest.

 

Ick lov' V, grooten Godt, dat Ghy in V soo goet zijt;

 

Ick danck' V, goeden Godt, dat Ghy aen ons soo soet zijt;

 

Ick lov' V, soeten Godt, dat Ghy zijt over-schoon;

 

Ick danck' V, schoonen Godt, dat Ghy zijt onsen loon.

 

Maer want al onsen danck en lof voor V beswijcken,

 

Soo vind' ick noch den danck en lof die V ghelijcken:

 

V Min zy uwen danck, u Woordt zy uwen lof;

 

Die twee zijn recht bequaem tot soo verheven stof.